Ikipe ya Arsenal yatanze ikirego mu ishyirahamwe ry’abasifuzi mu Bwongereza,PGMOL ku bijyanye no gukinirwa nabi kwa Bukayo Saka kw’abakinnyi baba bahanganye.

Ikipe ya The Gunners ibona ko abakinnyi ba Premier League badahanwa bihagije kubera amakosa akabije bakorera kuri uyu mukinnyi mpuzamahanga w’Ubwongereza - akenshi ngo ntibahabwa amakarita y’umuhondo n’abasifuzi.

Iki kibazo cyahawe bwa mbere uru rwego rw’abasifuzi ba Premier League mu kiganiro gisanzwe cyabaye umwaka ushize gihuje amakipe yose akina shampiyona

Arsenal yegeranyije ibyabaye inatanga n’ibimenyetso kugira ngo bumve igitekerezo cyayo.

Saka w’imyaka 22,yabaye umukinnyi wa gatatu muri shampiyona ukorerwaho amakosa cyane muri 2023 angana na 87, inyuma y’uwa Crystal Palace ukina imbere Jordan Ayew (117) na Bruno Guimaraes wo hagati wa Newcastle (92).

Impungenge zariyongereye cyane ubwo Saka yagiraga imvune ya Achilles muri iyi shampiyona nyinshi, ndetse akurwa mu kibuga kare mu mukino wa Champions League na Lens ku ya 3 Ukwakira.

Kubera iyo mpamvu,urwego rwa Saka rwaragabanutse, kuko afite igitego kimwe mu mikino itandatu ya Premier League aheruka gukina.