Amakuru avuga ko Arsenal yiteguye kongera imbaraga mu gushaka rutahizamu wa Brentford, Ivan Toney,umaze igihe mu bihano.

Ikipe ya The Gunners ngo yaba ishaka gusinyisha uyu rutahizamu mu isoko ryo muri Mutarama kugira ngo yongere amahirwe yo kwegukana igikombe cya shampiyona.

Iyi kipe ifite ba rutahizamu babiri,Gabriel Jesus na Eddie Nketiah badatsinda ibitego byinshi nkuko babisabwa n’abafana babo.

Ikipe ya Mikel Arteta iri ku mwanya wa gatanu muri Premier League,nyuma yo kunganya ibitego 2-2 na mukeba wayo i London, Tottenham ku cyumweru.

Muri uyu mukino,Rutahizamu Jesus yahushije igitego cyabazwe asigaranye n’izamu ryonyine ndetse we na Nketiah babanje mu kibuga ariko ntibatanga umusaruro wifuzwa.

Nk’uko ikinyamakuru Mirror kibitangaza ngo Brentford yiteguye gutandukana na rutahizamu wayo Toney gusa ishaka miliyoni 60 z’amapound ku ikipe iushaka muri Mutarama.

Toney yahagaritswe amezi 8 kubera ibyaha byo gutega ku mikino gusa azagaruka mu kazi mu kwezi kwa mbere tariki ya 16.

Uyu mukinnyi w’umuhanga mu gutsinda ibitego,yatangiye imyitozo nyuma y’amezi ane ari inyuma ya ruhago.

Mu mwaka w’imikino ushize,Ivan Toney yatsinze ibitego 20 muri Premier League ndetse agaragaza urwego ruhanitse kuko yatsinze amakipe akomeye.

Ivan Toney arifuzwa cyane na Arsenal