Al Ahli Tripoli yatsinze APR BBC amanota 90-68 mu mukino witabiriwe ka Perezida Paul Kagame na Madamu Jeannette Kagame.

Sponsored Ad

Uyu mukino w’ishiraniro wabaye ku mugoroba wo kuri uyu wa Kabiri tariki ya 20 Gicurasi 2025 muri BK Arena.

Amakipe yombi yagiye gukina uyu mukino yari yitwaye neza mu mikino ibiri ya mbere ibanza, buri kipe isabwa gutsinda ikabona itike yo gukina imikino ya nyuma (Finale).

APR BBC yakinnye uyu mukino idafite umunyamali Aliou Diarra wagize ikibazo cy’imvune mu mikaya yo mu matako (hamstring injury) mu mukino aheruka gutsindamo MBB yo muri Afurika y’Epfo amanota 103-81.

Ikipe y’ingabo yatangiye neza umukino watangiye abakinnyi nka Youssoupha Ndoye, Chasson Randle na Noel Obbadiah batsinda amanota.

Agace ka mbere karangiye APR BBC iyoboye umukino n’amanota 17 kuri 11 ya Al Ahli Tripoli.

Ikipe y’ingabo yakomerejeho gutsinda binyuze muri Noel Obbadiah, na Alex Mpoyo watsinze amanota atatu yikurikiranya.

Aka gace kagezemo hagati, ikipe yo muri Libya yongereye ikinyuranyo ibifashijwemo n’abakinnyi nka Mohamed Sadi na Nassim Bedrush.

Habura isegonda rimwe, Jacques Boissy yatsinze amanota atatu yafashije Ikipe gusoza igice cya mbere iyoboye umukino n’amanota 42 kuri 41 ya APR BBC.

Mu gace ka gatatu, Al Ahli Tripoli yakomerejeho abarimo Jean Jacques Boissy, Mohammed Sadi na Nassim Bedrush batsinda amanota menshi ndetse ikinyuranyo kigera mu manota arindwi (57-50).

Aka gace karangiye Al Ahli Tripoli ikomeje kuyobora umukino n’amanota 61 Kuri 52 ya APR BBC umukino wakomeje kwegerana kuko amakipe yamaze iminota itatu nta nota.

Mu gace ka nyuma, ikipe yo muri Libya yakomerejeho abarimo Nassim Bedrush, Mohamed Sadi na Caleb Agad batsinda amanota atatu ndetse ikinyuranyo kiba amanota 21 (86-65).

Umukino warangiye Al Ahi Tripoli itsinze APR BBC amanota 90-68, ihita ibona itike yo gukina itike y’imikino ya nyuma izabera muri Afurika y’Epfo muri Kamena 2025.

Umukino wabanje, MBB yo muri Afurika y’Epfo yabonye intsinzi ya mbere mu itsinda rya Nile Conference nyuma yo gutsinda Nairobi City Thunder yo muri Kenya amanota 75-74.

Umunsi wa kane mu yo kwishyura uzakinwa ku wa Kane tariki ya 22 Gicurasi 2025.

Al Ahli Tripoli izakina na NCT saa kumi, mu gihe APR BBC izakina na MBB saa moya.

Perezida Paul Kagame na Madamu bitabiriye umukino APR BBC yatsinzwemo na Al Ahli Tripoli BBC
Robbeyns Williams azamukana umupira Obadiah Noel atera Lancer Franc MBB yatsinze Nairobo City Thunder mu mukino w’ishiraniro