Ikipe ya Al Ahly yo muri Libya yageze muri 1/2 cy’Imikino ya nyuma ya BAL 2024 nyuma yo gutsinda Al Ahly yo mu Misiri ifite igikombe giheruka amanota 86-77. Aha ni mu mikino ya nyuma ya BAL4 iri kubera i Kigali.

Mu mukino wayoroheye mu duce tubanza uretse aka nyuma Al Ahly yo mu Misiri yaje kwisubiraho nubwo byarangiye itsinzwe.

Agace ka mbere karangiye iyi kipe yo muri Libya iyoboye ku manota 15-14.

Igice cya mbere cyarangiye iyi kipe yo muri Libya itsinze amanota 38 kuri 36 ya Al Ahly yo mu Misiri.

Agace ka Gatatu karangiye Al Ahly yo muri Libya igatsinze ku manota 55-49.

Umukino wa kabiri w’umunsi wa 1/4 muri BAL, rwabuze gica hagati ya FUS Rabat na Cape Town Tigers.

Iminota isanzwe y’umukino yarangiye amakipe yombi anganya amanota 83-83, hashyirwaho iminota itanu y’inyongera.

Iyi minota yarangiye Cape Town Tigers itsinze amanota 91-88 ya FUS Rabat.

Uyu mukino nawo wabereye muri BK Arena kuri iki Cyumweru, wari unogeye ijisho biturutse ku guhangana kwari hagati y’amakipe yombi.

Amakipe yombi yahuriye mu mukino wa ¼ wabereye muri BK Arena kuri iki Cyumweru.

Mu bakinnyi bitwaye neza bagatsinda amanota menshi, Tony Rasean Mitchell Jr yatsindiye amanota 17 ikipe ya Al Ahly yo mu misiri akurikirwa na Ehab Amin Saleh watsinze 13 mu gihe Majok Machal Deng yatsinze 25 akurikirwa na Lual Lual Acuil watsinze 23 aribo bayoboye abandi muri Al Ahly Libya.

Iyi mikino izakomeza ku wa Mbere, tariki 27 Gicurasi 2024, aho US Monastir izakina na Rivers Hoopers saa Kumi n’imwe, mu gihe Petro de Luanda izakina na AS Douanes saa Mbiri z’ijoro.