Rutahizamu Karim Benzema ashobora kudahabwa umwanya n’umutoza we muri Al-Ittihad,Nuno Espirito Santo,bafitanye amakimbirane akomeye.

Uyu mugabo w’imyaka 35 watwaye Ballon d’Or,yerekeje muri Saudi Arabia muri iyi mpeshyi avuye muri Real Madrid.

Benzema yari yatangiye neza muri Asia ubwo yatsindaga ibitego 3 mu mikino 4 bakina igikombe cya Arab Club Champions Cup.

Icyakora uyu mukinnyi uhembwa miliyoni 3.3 ku cyumweru,ntiyabashije gutsinda igitego mu mikino ibiri ifungura shampiyona ikipe ye ya Al-Ittihad yatsinze.

Ikinyamakuru cyo muri Saudi, Asharq Al-Aswat,kiravuga ko Nuno ashaka gukura Benzema mu ikipe ibanza mu kibuga.

Ibi biraterwa nuko umubano wabo utifashe neza ndetse ngo uyu mutoza ntiyashakaga ko Benzema aza muri iyi kipe ngo kuko adakunda imikinire ye.

Ku rundi ruhande,Benzema yavuze ko afatwa nabi cyane n’umutoza we.

Ibi ngo byaje nyuma y’uko yimwe igitambaro cy’ubukapiteni kandi ngo byari mu masezerano ye ubwo yemeraga gusinyira Al-Ittihad.

Nuno yafashije Al-Ittihad kwegukana igikombe cya shampiyona umwaka ushize ndetse iyi kipe ngo yayishyize ku rwego rwo hejuru gusa ngo ashobora kubura akazi ke kubera gushwana na kizigenza Benzema.

Al-Ittihad babinyujije ku mbuga nkoranyambaga bari gusaba Nuno guhindura imikinire akabonera umwanya Benzema aho bavuga ko ananiwe kumubonera umwanya nta mutoza waba umurimo.

Benzema yatsinze ibitego 354 mu mikino 648 yakinnye mu myaka 14 yamaze muri Real Madrid.