Nyuma y’aho Coronavirus ihagaritse imikino yose harimo n’iiyagombaga guhuza ibihugu muri Werurwe uyu mwaka,CAF yashyize hanze ingengabihe y’uko imikino yo gushaka itike yo kwerekeza mu gikombe cya Afurika 2022.

Sponsored Ad

Kuri uyu wa 19 Kanama 2020,CAF yashyize hanze ingengabihe y’uko amakipe azasubukura Imikino yo gushaka itike y’igikombe cya Africa 2022.

Amavubi azacakirana na Cape verde umukino ubanza n’uwo kwishyura mu kwezi kwa 11 uyu mwaka.

Imikino yo gushaka itike y’Igikombe cya Afurika cya 2022,U Rwanda rwari kuzahura na Cap-Vert mu mikino ibiri yari iteganyijwe kuba tariki ya 25 I Praia n’iya 29 I Kigali Werurwe 2020.

U Rwanda rwatsinzwe imikino 2 ibanza yo mu itsinda F na Mozambique ibitego 2-0 mu mukino wa mbere wo gushaka itike yo kwerekeza mu gikombe cya Afurika,hanyuma mu mukino wa kabiri wo gushaka iyi tike rutsindwa na Cameroon igitego 1-0 I Kigali.

Amanota atatu Cameroon yabonye yayifashije kugira amanota 4 mu itsinda rya gatandatu mu gihe u Rwanda arirwo ruri ku mwanya wa nyuma nta nota na rimwe rufite, ahubwo rufite umwenda w’ibitego 3.

Impuzamashyirahamwe y’Umupira w’Amaguru muri Afurika (CAF) yemeje ko Igikombe cya Afurika cya 2021 cyagombaga kubera muri Cameroun cyimuriwe muri Mutarama 2022.

Kuwa 30 Kamena 2020, nibwo habaye inama ya Komite Nyobozi ya CAF yateranye hifashishijwe ikoranabuhanga ry’amashusho.

Yari igamije gufata ibyemezo no kwiga ahazaza h’umupira w’amaguru wa Afurika nyuma y’uko ugizweho ingaruka n’icyorezo cya Coronavirus cyibasiye Isi.

Perezida wa CAF, Ahmad Ahmad, yemeje ko Igikombe cya Afurika cya 2021 cyari kubera muri Cameroun guhera tariki ya 9 Mutarama kugeza ku wa 6 Gashyantare 2022, kimuriwe muri Mutarama 2022.

Iri rushanwa rizahuza amakipe 24, ryimuwe bitewe n’uko kugeza ubu hakinwe imikino ibiri gusa y’amatsinda yo gushaka itike yo kuryitabira mu gihe indi ine isigaye, byari biteganyijwe ko izaba yarangiye mu Ukwakira.

Impuzamashyirahamwe ry’Umupira w’Amaguru ku Isi (FIFA) ryatangaje ko Umugabane wa Afurika uri mu itemerewe gutegura imikino mpuzamahanga kugeza muri Nzeri uyu mwaka.

Hemejwe ko CAN 2021 isimbuzwa Igikombe cya Afurika cy’abakina imbere mu bihugu byabo (CHAN 2020) cyagombaga kubera muri Cameroun hagati ya tariki ya 4 n’iya 25 Mata 2020.