Imikino y’amatsinda mu Gikombe cya Afurika (CAN 2025), yakomeje amakipe arimo Afurika y’Epfo na Misiri atangira neza irushanwa.

Ni imikino yabaye ku wa Mbere, tariki ya 22 Ukuboza 2025, ubwo hasozwaga iya mbere mu Itsinda A ndetse n’iyo mu Itsinda B yabereye ku bibuga bitandukanye.

Umukino wabanje wahurije Mali na Zambia kuri Stade Mohammed V.

Muri uyu mukino, ku munota wa 36, Ikipe y’Igihugu ya Mali yabonye amahirwe gufungura amazamu kuri Penaliti yatewe na EL Bilal Toure, ikurwamo neza n’umunyezamu Willard Mwanza.

Igice cya mbere cyarangiye amakipe anganyije ubusa ku busa busa.

Mu igice cya kabiri, Mali yakomeje gusatira bidatsinze ku munota wa 61’ yafunguye amazamu ku gitego cyatsinzwe na Lassine Sinayoko.

Ku munota wa 90+2’ rutahizamu Patson Daka yishyuriye Zambia igitego ku mupira yatsindishije umutwe ari mu rubuga rw’amahina.

Ntakindi gitego cyabonetse kugeza iminota 90 y’umukino irangiye.

Undi mukino wabaye ufungura itsinda rya kabiri wahuje Afurika y’Epfo na Angola byakinnye umukino unogeye ijisho kuri buri mukunzi wese wa ruhago cyane abari ku kibuga Stade de Marrakech.

Ku munota wa 21’ Afurika y’Epfo yafunguye amazamu ku gitego cyatsinzwe na Oswin Appollis ku ishoti yatereye mu rubuga, umupira uruhukira mu rushundura.

Ntabwo ibyishimo byamaze kabiri kuko nyuma y’iminota 14 Show yahise yishyura iki gitego bituma amakipe asoza igice cya mbere anganya igitego 1-1.

Byasabye igice cya kabiri ku munota wa 79 kugira ngo Afurika y’Epfo ibona igitego cya kabiri cyinjijwe na rutahizamu Lyle Foster ku ishoti rikomeye yatereye hanze y’uburuga rw’amahina akawutereka mu rushundura.

Iminota ya nyuma yihariwe na Angola yashakaga igitego cyo kwishyura ariko ubwugarizi bw’Afurika y’Epfo n’umunyezamu bakomeza guhagarara neza.

Umukino warangiye Afurika y’Epfo itsinze Angola ibitego 2-1, itangira neza imikino y’igikombe cya Afurika cya 2025.

Bafana Bafana yaherukaga gutsinda umukino wa mbere mu Gikombe cya Afurika mu myaka 21 ishize.

Umukino usoza iyo mu itsinda B wahuje Misiri na Zimbabwe kuri Stade Adrar.

Ikipe y’igihugu ya Zimbabwe ni yo yatangiye neza umukino bidatsinze ku munota wa 21 yafunguye amazamu ku gitego cyatsinzwe na Prince Dube ku mupira mwiza yahawe na Emmanuel Jalai awushyira mu izamu.

Mu minota 25, iyi kipe yanyuzagamo igasatira ariko igahusha uburyo bukomeye bw’ibitego yabonaga.

Ku rundi ruhande, Misiri yasatiraga ishaka kwishyura itangira no kugerageza guterera amashoti akomeye hanze y’urubuga rw’amahina.

Iyi kipe yo muri Afurika y’Amajyaruguru yatangiranye igice cya kabiri imbaraga nyinshi.

Ku munota wa 64, Omar Marmoush yacomekewe umupira mwiza azamuka yihuta yishyura igitego nyuma yo guhusha ibindi byinshi.

Mu minota 70, umukino wakomeje kugenda muri uwo mujyo Misiri ishaka igitego cy’intsinzi ariko abakinnyi b’inyuma bakabyitwaramo neza.

Muri iyi minota Zimbabwe yacunganaga n’imipira Misiri itakaza ubundi ikazamuka yihuta igerageza gushaka igitego cya kabiri ariko umunyezamu Mohamed El Shenawy akayibera ibamba.

Mu minota ya nyuma, Misiri yari yakomeje gusatira cyane, Mohamed Mustafa yacomekeye umupira Mohamed Salah agundagurana na myugariro ariko arahindukira atsinda igitego cya kabiri ku munota wa 91.

Umukino warangiye Misiri yatsinze Zimbabwe bigoranye ibitego 2-1.

Kuri uyu wa Kabiri tariki ya 23 Ukuboza 2025, imikino irakomeza mu itsinda DR Congo irahura na Benin saa Munani n’Igice naho Sénégal ifite igikombe cya 2021 irahura na Botswana saa kumi n’imwe.

Guhera saa Moya n’Igice mu itsinda C Nigeria irakina na Tanzania naho Tunisia ikine na Uganda.

Mali yanganyije na Zambia igitego 1-1

Lyle Foster yahesheje Afurika y’Epfo amanota atatu ya mbere ya CAN 2025

Abakinnyi ba Zimbabwe bishimira igitego

Abakinnyi ba Zimbabwe bishimira igitego