Uwari Umutoza w’Amavubi, Umunya-Espagne Carlos Alos Ferrer,yagizwe umutoza mukuru w’ikipe y’igihugu cya Belarus yo ku mugabane w’u Burayi.

Ibi bibaye nyuma y’aho mu gitondo cyo kuri uyu wa kabiri tariki 8 kanama 2023 aribwo uyu Munya-Espagne w’imyaka 47 , yatangaje ko yasezeye FERWAFA,anifuriza amahirwe ikipe y’igihugu Amavubi yari amazemo umwaka n’amezi 3 atoza .

Muri Belarus ,Carlos Ferrer yahawe amasezerano y’umwaka umwe asimbuye Georgy Kondratyev.

Uyu Munya-Espagne w’imyaka 48,yasabwe gufasha Belarus kubona itike ya EURO 2024 no kwitwara neza mu mikino ya UEFA Nations League ya 2024/25.

Aya masezerano azarangirana na 2024, ariko akaba ashobora kongerwa mu gihe yagera ku byo yasabwe.

Mu mikino 12 (habariwemo n’iya gicuti) yatoje ikipe y’igihugu Amavubi, yatsinze umwe nawo wa gishuti, anganya 5 atsindwa 6,yinjije ibitego 4 yinjizwa 13.

Mu mezi 15 abaye mu Rwanda, umutoza Carlos Alòs acyuye imbumbe ya miliyoni 210 FRW.

Uyu mutoza buri kwezi yahembwaga amadolari ya Amerika ibihumbi 12 wakuba amezi 15 akagera ku bihumbi 180 by’amadolari bingana na kariya kayabo mu manyarwanda.

Belarus ya 98 ku Isi ku rutonde rwa FIFA ruheruka gutangazwa muri Kanama, ntirakinaho imikino ya nyuma y’Igikombe cy’u Burayi.

Belarus ni igihugu kiri ku mugabane w’u Burayi bw’uburasirazuba.

Mu burasirazuba bw’amajyaruguru ya Belarus hari u Burusiya, mu majyepfo hari Ukraine, Iburengerazuba hari Pologne.

Mu majyaruguru w’Uburengerazuba hari igihugu cya Lithuania na Latvia.

Umujyi wa Belarus ni Minsk mu gije ibarura rya Banki y’isi ryo mu 2021 ryasize iki gihugu gituwe na miliyoni 9.34.