Ikipe ya Chelsea yongeye kuvugwaho ibyo gufatirwa ibihano aho kuri iyi nshuro havugwa ko ishobora gukurwaho amanota nyuma y’uko bivugwa ko hari ubwishyu yatanze mu ibanga rikomeye ubwo yari ifitwe na Roman Abramovich nkuko inyandiko zasohotse zibigaragaza.

Ikipe ya The Blues isanzwe ikorwaho iperereza na Premier League kubera ikibazo cya Financial Fair play,cyagejejwe kuri Todd Boehly wayiguzemuri Gicurasi 2022.

Hagati aho, bivugwa ko amafaranga ashobora kuyikoraho ari ayo yishyuye rwihishwa igura Willian na Samuel Eto’o.

Nta bwo bizwi akayabo aba baguzwe gusa bizwi n’umuherwe w’Umurusiya Suleiman Kerimov, wahoze ari nyiri Anzhi Makhachkala.

Iyi kipe iheruka gucibwa akayabo ka miliyoni 8.6 z’amapawundi kubera gutanga amakuru atari yo mu kugura abakinnyi hagati ya 2012 na 2019.

Iperereza ryakozwe n’ikinyamakuru The Guardian ndetse n’abandi bafasha mu itangazamakuru hifashishijwe impapuro zagiye hanze zari zarahishwe,hagaragaye ko habaye kwishyura mu ibanga amwe mu mafaranga bityo hicwa amabwiriza ajyanye na financial fair play.

Chelsea bivugwa ko yagiye ikoresha amakonti y’ibanga y’umuherwe Abramovich kugira ngo igure abakinnyi binyuranyije n’amategeko mu gihe cy’imyaka 10.

Nubwo havugwa Willian na Eto’o hari amakuru avuga ko hari n’abantu bagiye bishyurwa kugira ngo bagire icyo bafasha Chelsea mu kugura abakinnyi.

Ngo hari izindi nyandiko zitasuzumwe zishobora gushyira Chelsea mu mazi abira nubwo nyiri ikipe Boehly yishinganishije muri Premier League avuga ko atazigera ahanirwa amakosa yaba yarakozwe mbere.

Abramovich yaguze Chelsea miliyoni 140 z’amapawundi muri 2003 ayifasha kwegukana Premier League eshanu,Champions League abyiri n’ibindi bikombe byinshi.

Uyu mugabo yayigurishije umwaka ushize nyuma yo gufatirwa ibihano na Guverinoma y’Ubwongereza kubera Uburusiya avukamo bwateye Ukraine.