Ikipe ya Chelsea yatangaje ko yaguze myugariro wari usanzwe akinira Leicester City,Wesley Fofana ku kayabo ka miliyoni 75.
Nyuma ya Koulibaly na Cucurella,Chelsea yazanye myugariro wa 3 mu rwego rwo kurushaho gukomeza ubwugarizi bwayo budahagaze neza muri iyi minsi ndetse uyu we yamusinyishije amasezerano y’imyaka 7.
Uyu mukinnyi mpuzamahanga w’abatarengeje imyaka 21 mu Bufaransa, Fofana, yinjiye muri Leicester avuye mu ikipe ya Saint-Etienne mu 2020 kandi kuva ubwo yayikiniye imikino 37 ya (...)

Sponsored Ad

Ikipe ya Chelsea yatangaje ko yaguze myugariro wari usanzwe akinira Leicester City,Wesley Fofana ku kayabo ka miliyoni 75.

Nyuma ya Koulibaly na Cucurella,Chelsea yazanye myugariro wa 3 mu rwego rwo kurushaho gukomeza ubwugarizi bwayo budahagaze neza muri iyi minsi ndetse uyu we yamusinyishije amasezerano y’imyaka 7.

Uyu mukinnyi mpuzamahanga w’abatarengeje imyaka 21 mu Bufaransa, Fofana, yinjiye muri Leicester avuye mu ikipe ya Saint-Etienne mu 2020 kandi kuva ubwo yayikiniye imikino 37 ya Premier League.

Yasibye imikino irindwi ya shampiyona mu mwaka w’imikino 2021-22 nyuma yo kuvunika ukuguru mu mukino wa gicuti wabanjirije shampiyona bakinnye na Villarreal.

Nyuma yo gusinya yagize ati: "Iminsi ibiri ya nyuma yabaye miremire kuri njye kandi ndishimye cyane.

Nitoje muri iki gitondo hamwe n’ikipe kandi ni inzozi kuri njye. Niteguye cyane gutangira gukina imikino ku bw’abafana ndetse n’ikipe.

"Ndi hano gutwara ibikombe - Champions League, Premier League, FA Cup, Carabao Cup, byose. Naje hano gutsinda kandi iyi kipe yubakiwe gutwara ibikombe kandi ndi hano kugira ngo nkomeze."

Ubariyemo n’amafaranga azongerwaho niyitwara neza, amasezerano yo kugura uyu musore w’imyaka 21 ntabwo arenga miliyoni 80 z’ama pound Manchester United yishyuye Leicester kuri Harry Maguire muri 2019 - karacyari agahigo ku isi kuri myugariro.

Niwe myugariro wa gatatu uhenze cyane muri Premier League nyuma ya Maguire na Virgil van Dijk wa Liverpool, winjiye muri The Reds kuri miliyoni 75 z’ama pound muri 2017.

Amafaranga yaguzwe Fofana amugira umukinnyi wa 12 uhenze muri Premier League, ariko azamanuka ku mwanya wa 13 ubwo Manchester United izaba yarangije gusinyisha Antony kuri miliyoni 81.3 z’amapawundi.

Umuherwe nyiri Chelsea, Todd Boehly - wakoresheje hafi miliyoni 250 z’amapound mu isoko rye rya mbere kuva yagura iyi kipe na Roman Abramovich - yagize ati: "Wesley ni myugariro utanga icyizere cyane kandi yamaze kwerekana ko afite ubuhanga muri Premier League akiri muto.

"Twishimiye ko twashoboye kuzana imwe mu mpano zishimishije I burayi muri Chelsea no kurushaho gukomeza ubwugarizi bw’ikipe yacu, haba muri uyu mwaka w’imikino ndetse n’izindi nyinshi ziri imbere."

Fofana yari mu bakinnyi 11 umutoza Brendan Rodgers yakoresheje ubwo Leicester yatwaraga igikombe cya FA ku nshuro ya mbere mu mateka yayo itsinze Chelsea ku mukino wa nyuma wa 2021 igitego 1-0.

Chelsea imaze gutsindwa ibitego 8 mu mikino 5 ya Shampiyona gusa yo yinjije 6.

Isoko rirafungwa kuri uyu wa Kane.