Ikipe ya Arsenal ikomeje kujya mu bihe bibi kuko ku mukino wa kabiri wa shampiyona yatsinzwe na Chelsea ibitego 2-0 biyishyira ku mwanya wa 19 ubanziriza uwa nyuma nta nota na rimwe ibonye.

Sponsored Ad

Nyuma yo gutsindwa na Brentford ibitego 2-0,kuri iki cyumweru yatsindiwe ku kibuga cyayo na Chelsea ibitego 2-0 byose byinjiye mu gice cya mbere.

Arsenal yatsinzwe imikino ibiri yayo ibanza ya shampiyona itinjije igitego ku nshuro ya mbere mu mateka yayo.

Romelu Lukaku wakinnye umukino we wa mbere muri Chelsea nyuma yo kugurwa miliyoni 97 z’amapawundi, niwe watsinze igitego cya mbere ku munota wa 15 ku mupira mwiza yahawe na Reece James.

Lukaku w’imyaka 28,yari amaze imyaka 9 n’iminsi 360 akinnye umukino we wa mbere muri Chelsea ariyo mpamvu yakoze cyane kugira ngo yigarurire imitima y’abafana.

Ku munota wa 35,Chelsea yabonye igitego cya kabiri cyatsinzwe na Reece James nyuma y’umupira mwiza yahawe na Mason Mount agaca mu rihumye ba myugariro ba Arsenal bari barangaye.

Lukaku wabyigaga cyane ba myugariro ba Arsenal,yabonye amahirwe menshi yo kubona ibitego byinshi ariko umunyezamu Leno amubera ibamba.

Arsenal itakigira umukino wubakitse kubera urwego rwo hasi rwa bamwe mu bakinnyi bayo,niyo kipe imaze gutanga amafaranga menshi mu kugura abakinnyi muri iyi mpeshyi ariko nta n’umwe wakora ikinyuranyo mu bo yaguze.

Umutoza Arteta utaramara imyaka 2 muri Arsenal,amaze gutsindirwa mu rugo imikino myinshi kurusha iyo Arsene Wenger yatsinzwe mu myaka 6.

Arsenal iri mu mazi abira kuko ku mukino w’umunsi wa 3 izasura Manchester City imaze iminsi iyitsinda iyo bahuye.

Umutoza Mikel Arteta yatangaje ko gutsindwa uyu mukino byatewe nuko yabuze abakinnyi 9 bakomeye ndetse ngo nibaba bagarutse azitwara neza gusa yijeje abafana ko azatsinda umukino wo hagati mu cyumweru azakina na West Bromwich muri Carabao Cup.

Umutoza Arteta yabwiye BBC Sport ati: "Sintekereza ko ikipe mu mateka yayo yigeze ihura n’ikintu nk’iki".

"Tugomba guhangana n’iyi ngorane. Shampiyona cyangwa umwanya ntabwo birangira mu kwezi kwa munani. Ikintu kibi cyane ushobora gukora ni ukwiheba. Birumvikana ko ibyo tutagiye kubikora".

Arsenal iri mu cyiciro cy’amakipe ashobora kumanuka akava muri Premier League, ku nshuro ya mbere kuva mu kwezi kwa munani mu 1992.

Arteta yongeyeho ati: "Ugomba kumva ibihe turimo. Turimo kubura abakinnyi icyenda, kandi biragoye. Ntabwo ari abakinnyi icyenda babonetse bose - ni abakinnyi bakomeye cyane".

Kubera Covid, ku mukino na Brentford, Arsenal ntiyari ifite ba rutahizamu babiri bayo bakomeye Pierre-Emerick Aubameyang na Alexandre Lacazette, kongeraho Willian n’umunyezamu w’umusimbura Alex Runarsson.

Aubameyang yari ku ntebe y’abasimbura ku mukino na Chelsea, ariko myugariro Ben White waguzwe miliyoni 50 z’amapawundi ntabwo yakinnye nyuma yuko bamusanzemo Covid.

Thomas Partey, Gabriel na Eddie Nketiah na bo bose bafite imvune.

Arteta yagize ati: "Hari ibintu byiza byinshi. Abakinnyi batanu bafite imyaka 19 cyangwa 20 bakinnye kuri uru rwego ku nshuro ya mbere - ibyo bizagira ingaruka nziza ariko kuri ubu biragoye".

"Ntabwo nkunda kumva nigiriye impuhwe ubwanjye. Ntekereza ko buri wese ashobora kubona ko ubu tudafite ikipe dushaka kandi bisa nkaho birushaho kugorana umunsi ku wundi".