Ikipe ya Chelsea yamaze kumvikana na Brighton &Hove Albion ku kugura umukinnyi wo hagati Moises Caicedo yifuje cyane kuva mu kwezi kwa gatanu uyu mwaka.

Nkuko isanzwe ibigenza ku isoko,iyi kipe yakoze agahigo ko kugura umukinnyi ku giciro kiri hejuru y’ibindi byose byaguzwe abakinnyi kuko Moises Caicedo yamutanzeho miliyoni 115 z’amapawundi.

Iyi kipe ni nayo yari ifite agahigo ko kugura umukinnyi uhenze mu Bwongereza kuko yaherukaga kugura Enzo Fernandes akayabo ka miliyoni 107 z’amapawundi imukuye muri Benfica.

Caicedo yanze kwerekeza muri Liverpool yari yamutanzeho miliyoni 111 z’amapawundi ndetse amakipe yombi yamaze kumvikana.

Kuwa Kane w’icyumweru gishize nibwo Liverpool yari yamaze kumvikana na Brighton ariko uyu mukinnyi avuga ko atahemukira Chelsea kuko bari bumvikanye mbere.

Amakuru aravuga ko uyu mukinnyi arasinya imyaka umunani ishobora kongerwaho umwe ikaba icyenda.

Caicedo arakora ikizamini cy’ubuzima uyu munsi hanyuma ahite atangazwa ku mugaragaro ndetse ahite afatanya n’abandi kwitegura umukino utaha.

Brighton yungutse amafaranga menshi kuri Caicedo kuko yamuguze 4.5 z’amapawundi imukuye mu ikipe y’iwabo muri Ecuador yitwa Independiente del Valle muri 2021.

Uyu musore yagize umwaka w’imikino mwiza ubushize,kuko muri Premier League yakinnye imikino 37 afasha iyi kipe kurangiza ku mwanya wa 6.

Chelsea yazanye umukinnyi wo hagati nyuma yo kurekura Ruben Loftus-Cheek, Mateo Kovacic, Mason Mount na N’Golo Kante.