Ikipe y’igihugu ya Colombia yageze ku mukino wa nyuma mu irushanwa rya Copa Amerika, nyuma yo gutsinda ikipe y’igihugu ya Uruguay igitego kimwe ku busa.

Sponsored Ad

Mu gitondo cyo kuri uyu wa Kane mu masaha yo mu Rwanda byari kuwa Gatatu mu masaha yo muri Leta Zunze Ubumwe za Amerika. Ikipe y’igihugu ya Colombia yakatishije itike yo kugera ku mukino wa nyuma itsinze Uruguay igitego kimwe ku busa. Ni umukino wabereye kuri Bank of America Stadia usifurwa n’umunya Mexico Caesar Ramos.

Ni umukino ikipe y’igihugu Uruguay yahabwaga amahirwe kurenza ikipe y’igihugu ya Colombia. Ibyo bakekaga si ko byagenze kuko Colombia yitwaye neza cyane mu mukino, itsinda igitego kimwe ku busa.

Impamvu Uruguay yahabwaga amahirwe yo gutsinda Colombia ni uko muri kimwe cya Kane yakoze akazi gakomeye cyane igasezerera ikipe y’igihugu ya Brazil.

Muri uyu mukino waranzwe no gutinyana ku mpande zombi, ku munota wa 35, ni bwo Jefferson Lerma yatsindiye Colombia igitego rukumbi yabonye muri uyu mukino, ku mupira yahawe na James Rodriguez.

Nyuma yo gusezerera Uruguay, Colombia izacakirana na Argentina ku mukino wa nyuma wa Copa Amerika, Argentina yahageze isezereye Canada. Ikipe y’igihugu ya Canada na Uruguay nazo zizacakirana hagati yazo zishakamo izegukana umwanya wa gatatu.