Rutahizamu Cristiano Ronaldo ntashaka kuzaguma muri Juventus niramuka itabonye itike yo gukina Champions League y’umwaka utaha ariyo mpamvu ashaka kwerekeza mu ikipe imwe hagati ya Manchester United cyangwa Paris Saint-Germain.

Cristiano Ronaldo uyoboye abandi mu gutsinda ibitego byinshi muri UEFA Champions League kuva yashingwa,afite impungenge ko Juventus akinira ishobora kutabona itike yo kwerekeza muri iri rushanwa ry’ikigugu ariyo mpamvu yatangiye gutekereza kwerekeza mu ikipe yamufasha gukina iri rushanwa akunda cyane.

Kugeza ubu,amakipe 2 niyo yiteguye kumugura nkuko ibinyamakuru byo ku mugabane w’I Burayi bibitangaza arimo Manchester United yakiniye kuva 2003-2009 na PSG yo mu Bufaransa irimo Mbappe na Neymar Jr.

Inter Milan niyo iyoboye shampiyona aho irusha amanota 13 Juventus gusa ntabwo iyi kipe ya Ronaldo iri kwitwara neza ariyo mpamvu benshi bavuka ko ishobora kubura itike ya UEFA Champions League.

Juventus ubu iri ku mwanya wa 4 muri Serie A gusa inganya amanota 66 na Napoli ya 3 na AC Milan ya 5.

Ikinyamakuru Tuttosport cyavuze ko uyu rutahizamu w’imyaka 36 atiteguye kuguma muri Juventus yavuye muri Champions League ndetse ngo mu mpeshyi azavugana na biriya bigugu 2.

Juventus nayo ngo ntiyashobora kwishyura Ronaldo igihe yaba idakinye Champions League cyane ko yashegeshwe na Covid-19.

Amakuru avuga ko Ronaldo ahembwa asaga miliyoni y’amapawundi ku cyumweru ariko nawe yitwara neza kuko ubu amaze gutsinda ibitego 32 mu mikino 37 yakiniye iyi kipe muri uyu mwaka w’imikino.CR7 afite amasezerano azamugeza muri 2022.