Kabuhariwe Cristiano Ronaldo uherutse gutangaza ko ashaka kuva muri Real Madrid,yasabye iyi kipe ko yamuha amasezerano mashya y’imyaka 3 ndetse agahembwa akayabo ka miliyoni 1 n’ibihumbi 35 by’amapawundi kugira ngo akomeze kuyikinira.

Uyu rutahizamu w’umunyabigwi yatangarije abanyamakuru ko atagishaka gukomeza gukinira Real Madrid,nyuma yo kuyifasha kwegukana igikombe cya UEFA Champions League ku nshuro ya 13 ndetse ya 3 yikurikiranya gusa mu mutambagiro wo kumurika iki gikombe I Madrid abwira abafana ko bari kumwe umwaka utaha.

Ikinyamakuru El Confidencial cyatangaje ko Cristiano Ronaldo uhembwa ibihumbi 350 by’amapawundi ku cyumweru atishimiye kuba Lionel Messi na Neymar bamurusha cyane umushahara, ndetse yifuza ko uyu mushahara Real Madrid yawukuba hafi 3 kugira ngo akomeze ayikinire.

Biravugwa ko abakinnyi bakomeye muri Real Madrid bari bazi ko Cristiano Ronaldo atazaguma muri iyi kipe umwaka utaha ndetse ubuyobozi bwa Real Madrid ntibwiteguye guha Cristiano Ronaldo uyu mushahara.

Real Madrid iramutse yemeye kwishyura Ronaldo aka kayabo,buri cyumweru yajya ahabwa akayabo k’ibihumbi 841 by’amapawundi ku cyumweru,ku mwaka agahembwa miliyoni 44 mu gihe imyaka 3 yazarangira Ronaldo yinjije miliyoni 210.

Ubuyobozi bwa Real Madrid nta bushake bufite bwo kongerera Ronaldo amafaranga ndetse biravugwa ko bagiye kongerera Gareth Bale amasezerano.