Rutahizamu wa Al-Nassr n’Ikipe y’Igihugu ya Portugal, Cristiano Ronaldo, yongeye gufata umwanya wa mbere mu bakinnyi 10 binjiza amafaranga menshi babikesha ko bakina umupira w’amaguru ku Isi.

Sponsored Ad

Raporo ngarukamwaka yashyizwe ahagaragara na Forbes Magazine muri iki cyumweru, yongeye kugaragaza ko Cristiano Ronaldo ari we winjiza amafaranga menshi mu bakina ruhago na miliyoni 285$.

Aya mafaranga arimo miliyoni 220$ yinjiza nk’umushahara ahembwa na Al-Nassr akinira muri Arabie Saoudite ndetse miliyoni 65$ akura mu masoko afite yo kwamamaza.

Forbes yagaragaje ko aya mafaranga menshi yabayeho ku muntu ukina umupira w’amaguru, uwigeze kuyarenza ari Floyd Mayweather ubwo yari agikina Iteramakofe.

Iyi raporo igaragaza uburyo umutungo w’abakinnyi wagiye uzamuka mu myaka 10 ishize. Mu 2014, Ronaldo yayoboye urutonde na miliyoni 73$, none ubu hiyongereyeho asaga miliyoni 200$.

Uyu Munya-Portugal yayoboye uru rutonde inshuro nyinshi, aho yabaga ahanganye na Lionel Messi wabaye uwa mbere mu 2019 ndetse no mu myaka yabanje nka 2018 na 2020.

Muri uyu mwaka, Messi ari ku mwanya wa kabiri na miliyoni 135$, aho yazamuwe cyane no kwerekeza muri Inter Miami ndetse n’amasoko yabonye kuva icyo gihe arimo gukorana na Adidas na Apple TV.

Neymar kuri ubu ukinira Al-Hilal, ari ku mwanya wa gatatu na miliyoni 110$, akurikiwe na Karim Benzema ubona miliyoni 104$, ubu na we ukinira Al Ittihad muri Arabie Saoudite.

Kylian Mbappé uheruka kugera ku nzozi ze zo gukinira Real Madrid, ari ku mwanya wa gatanu na miliyoni 90$. Andi mazina arimo Erling Haaland wa Manchester City winjijje miliyoni 60$ na Vinicius Jr wa Real Madrid winjije miliyoni 55$.

Uko abakinnyi 10 ba mbere ku Isi barushanwa mu kwinjiza agatubutse:

Cristiano Ronaldo: Umunya-Portugal w’imyaka 39, Al Nassr – Miliyoni 285$ (miliyoni 220$ mu kibuga na miliyoni 65$ hanze y’ikibuga)
Lionel Messi: Umunya-Argentine w’imyaka 37, Inter Miami – Miliyoni 135$ (miliyoni 60$ mu kibuga na miliyoni 75$ hanze y’ikibuga)
Neymar: Umunya-Bresil w’imyaka 32, Al Hilal – Miliyoni 110$ (Miliyoni 80$ mu kibuga na miliyoni 30$ hanze y’ikibuga)
Karim Benzema: Umufaransa w’imyaka 36, Al Ittihad- Miliyoni 104$ (miliyoni 100$ mu kibuga na miliyoni 4$ hanze y’ikibuga)
Kylian Mbappé: Umufaransa w’imyaka 25, Real Madrid- Miliyoni 90$ (miliyoni 70$ mu kibuga na miliyoni 20$ hanze y’ikibuga)
Erling Haaland: Umunya-Norvège w’imyaka 24, Manchester City - Miliyoni 60$ (miliyoni 46$ mu kibuga na miliyoni 14$ hanze y’ikibuga)
Vinicius Jr.: Umunya-Brésil w’imyaka 24, Real Madrid - Miliyoni 55$ (miliyoni 40$ mu kibuga na miliyoni 15$ hanze y’ikibuga)
Mohamed Salah: Umunya-Misiri w’imyaka 32, Liverpool – Miliyoni 53$ (miliyoni 35$ mu kibuga na miliyoni 18$ hanze y’ikibuga)
Sadio Mané: Umunya-Sénégal w’imyaka 32, Al Nassr - Miliyoni 52$ (miliyoni 48$ mu kibuga na miliyoni 4$ hanze y’ikibuga)
Kevin De Bruyne: Umubiligi w’imyaka 33, Manchester City - Miliyoni 39$ (miliyoni 35$ mu kibuga na miliyoni 4$ hanze y’ikibuga)