Mu bihugu bitandukanye imikino ya Shampiyona yarakomeje mu mpera z’icyumweru gishize, bamwe mu bakinnyi b’Abanyarwanda bakina hanze bafashije amakipe yabo kwitwara neza nubwo hari abo shampiyona zabo zitahiriye.

Sponsored Ad

Mu gihugu cya Ukraine shampiyona yakomezaga hakinwa umunsi wa 11, Ikipe ya FC Kryvbas Kryvyi Rih ikinamo Kapiteni w’Amavubi Bizimana Djihad yatsinze LNZ Cherkasy ibitego 3-1, yuzuza amanota 17 mu mikino 10 ihita ifata umwanya wa gatanu muri Shampiyona.

Muri uyu mukino Djihad yakinnye iminota yose y’umukino ndetse atanga umupira wavuyemo igitego cya mbere cyatsinzwe na Hrvoje Ilic ku munota wa 24.

Impera z’icyumweru zari nziza kuri Stade Tunisien yo mu cyiciro cya mbere muri Tunisia ikinamo Mugisha Bonheur yatsinze AS Gabes ibitego 2-1 mu mukino w’umunsi wa gatandatu wa shampiyona.

Mu bitego bibiri Stade Tunisien yatsinze harimo igitego cya kabiri cyatsinzwe na Mugisha Bonheur ku munota wa 70.

Ishimwe Anicet ukinira Olympique de Béja yo mu cyiciro cya mbere muri Tuniziya ntiyagaragaye mu mukino ikipe ye yanganyijemo na Club Africain igitego 1-1.

Myugariro Mutsinzi Ange ukinira FK Zira yo mu cyikiro cya mbere muri Azerbaijan yanganyije na Araz PFK igitego 1-1 mu mukino w’Umunsi wa 11 wa shampiyona yakinnyemo iminota yose y’umukino.

Myugariro w’Ikipe y’Igihugu, Imanishimwe Emmanuel ‘Mangwende’ ukinira AEL Limassol yo muri Cyprus yakinnye iminota yose y’umukino ikipe ye yanganyijemo na AEK Larnaca igitego 1-1 mu mukino w’uucecetse?munsi wa munani wa shampiyona yuzuza amanota 13.

Myugariro Rwatubyaye Abdul ukinira Brera Strumica yo muri Macedonia y’Amajyaruguru yakinnye iminota yose y’umukino mu mukino ikipe ye yanyagiwemo na KF Gostivar ibitego 4-1 mu mukino w’umunsi wa 11 wa shampiyona.

One Knoxville ikinamo rutahizamu Nshuti Innocent yanganyije na Spokane Velocity ubusa mu mukino uyu Munyarwanda yinjiye asimbuye ku munota wa 62.

Impera z’icyumweru zari nziza kandi kuri Rutahizamu Jojoe Kwizera ukinira Rhode Island watsinze igitego ku munota wa 82 mu mukino ikipe ye yanyagiyemo Miami FC ibitego 8-1.

Sandvikens IF ikinamo Byiringiro Lague yanganyije na Helsingborgs IF ibitego 2-2 mu mukino uyu Munyarwanda yinjiye asimbuye ku munota wa 84.

York Rafael wa Gefle IF yo muri Suède ukina mu kibuga yakinnye iminota yose y’umukino ikipe ye yatsinzwemo na Trelleborg igitego 1-0.

Samuel Guelette ukinira La Louviere yo mu cyikiro cya kabiri mu Bubligi yinjiye mu kibuga asimbuye ku munota wa 76 mu mukino ikipe ye yatsinzemo Lierse Sportkring ibitego 2-1 mu mukino w’Umunsi wa cyenda wa shampiyona ifata umwanya wa gatatu n’amanota 20.

Umuzamu Buhake Clement Twizere ukinira Ullensaker Kisa yo mu cyiciro cya kabiri muri Norway yakinnye umukino wose ikipe ye yatsinzwemo na Skeid igitego 1-0.

Impera z’icyumweru ntizahiriye umuzamu Ntwali Fiarce ukinira Kaizer chiefs yo muri Afurika y’Epfo wabanje mu kibuga mu mukino ikipe ye yatsinzwemo na Super Sports United igitego 1-0 mu mukino w’umunsi wa gatanu wa shampiyona.

Mu gihugu cya Kenya AFC Leopards ikinamo Rutahizamu Gitego Arthur ntiyakinnye mu mpera z’icyumweru kubera ko ikipe y’igihugu ya Kenya yakinaga na Sudani mu ijonjora rya mbere mu rugendo rwo gushaka itike ya CHAN 2024.

Al Ahli Tripoli yo muri Libya ikinamo Manzi Thierry ikomeje imyitozo yitegura Shampiyona ya 2024/25 izatangira tariki 25 Ugushyingo 2024.