Ikipe ya FC Barcelona yirukanye umutoza Xavi ahita asimburwa n’uwahoze ari umutoza wa Bayern Munich, Hansi Flick.

Sponsored Ad

Nyuma y’ibihuha byinshi bivuga ko Xavi azirukanwa,uyu munsi tariki ya 24 Gicurasi yirukanwe ndetse na FC Barcelona irabitangaza.

Ku cyumweru, Xavi azatoza Barcelona ku nshuro ya nyuma, ubwo izaba yakiriye Sevilla mu mukino wabo wa nyuma wa La Liga.

Kuri uyu wa gatanu, uyu mugabo w’imyaka 44, wari ufite amasezerano kugeza mu 2025, yamenyeshejwe icyemezo cy’iyi kipe ubwo yabonanaga na perezida wayo,Joan Laporta n’umuyobozi wa siporo Deco.

Uyu wahoze ari umukinnyi wo hagati wa Espagne,yatangaje muri Mutarama ko azava kuri Camp Nou, ariko nyuma y’ibiganiro aza kwemeza ko azahaguma muri Mata.

Amagambo Xavi aheruka kuvuga ku bijyanye n’ubukungu bw’ikipe bwifashe nabi, bivugwa ko yarakaje Laporta.

Barcelona yavuze ko yifuza "gushimira Xavi ku bw’akazi ke nk’umutoza" kuva yatangira kuyitoza mu 2021.

Xavi asize ahaye abakinnyi 15 bo muri Academy umwanya wo gukina, barimo Fermín López, Pau Cubarsí, Lamine Yamal na Marc Guiu.

Flick w’imyaka 59,nta kazi yari afite kuva yirukanwa n’Ubudage muri Nzeri 2023.

Muri 2020,uyu mudage watozaga Bayern Munich yegukanye Bundesliga, DFB-Pokal na Champions League.

Uyu yahawe amasezerano y’imyaka ibiri azageza muri 2026 aho azizanira abungiriza babiri.

Umukinnyi ukina imbere muri Barcelona, Robert Lewandowski w’imyaka 35, yatojwe na Flick kuri Allianz Arena imyaka ibiri.

Nyuma yo guhesha FC Barcelona igikombe cya La Liga mu 2022-23, ikipe ya Xavi yitwaye nabi muri uyu mwaka w’imikino

Aba ba Catalans barushwa amanota 12 na mukeba wabo Real Madrid, hasigaye umukino umwe wa shampiyona.

Ikipe ya Barcelona yasezerewe muri Champions League muri kimwe cya kane cy’irangiza na Paris St-Germain.

Xavi yamaze imyaka 17 muri FC Barcelona nk’umukinnyi, avuye mu ishuri rya La Masia.