Ishyirahamwe ry’Umupira w’amaguru mu Rwanda [FERWAFA] ryatangaje amafaranga yose yakoreshejwe mu makipe y’igihugu n’umwenda riberewemo na Minisiteri ya siporo.

Sponsored Ad

Abanyamuryango 41 muri 58, basaga 3/4 biteganywa n’amategeko ni bo bitabiriye iyi nteko Rusange Isanzwe ya FERWAFA iri kubera muri Kigali Convention Centre.

FERWAFA yatangaje ko amakipe y’Igihugu yakoresheje miliyari 1,177 Frw mu 2023 naho mu 2022 yari miliyari 1,449 Frw.

Mu 2023, Amavubi y’Abagabo yakoresheje miliyoni 357,3 Frw mu gihe yari miliyari 1,168 Frw mu 2022.

Abagore bakoresheje miliyoni 271,9 Frw naho amakipe mato akoresha miliyoni 135,3 Frw.

Ingendo, gucumbika n’umwiherero by’amakipe y’Igihugu byatwaye miliyoni 413 Frw mu 2023 mu gihe mu 2022 yari miliyoni 280,6 Frw.

Miliyoni 112 Frw yahawe amakipe akina Shampiyona, angana na 68% by’amafaranga yatanzwe n’abaterankunga ba Rwanda Premier League nk’uko byatangajwe na Mudaherwana Youssuf uyobora uru Rwego.

Ingendo zakozwe n’abayobozi n’abakozi ba FERWAFA mu 2023 zatwaye miliyoni 491,44 Frw avuye kuri miliyoni 189,95 Frw mu 2022.

Abateze indege mu 2023 bakoresheje miliyoni 168,46 Frw, imbere mu gihugu hakoreshwa miliyoni 54,49 Frw. Insimburamubyizi ku bikorwa by’imbere mu gihugu ni miliyoni 9,8 Frw naho ku bikorwa mpuzamahanga ni miliyoni 258,64 Frw.

Uru Rwego ruteganya kwakira miliyoni 320 Frw muri uyu mwaka, azava muri Startimes, FERWAFA na Gorilla Games.

Rwanda Premier League yatangaje ko yamaze kwakira miliyoni 190 Frw angana na 59,6%.

Raporo y’umutungo wa FERWAFA mu myaka ibiri ishize:

Mu 2023, FERWAFA yinjije miliyari 5,78 Frw mu gihe yakiriye miliyari 4,07 Frw mu 2022.

Ayakoreshejwe mu 2023 ni miliyari 5,079 Frw naho mu 2022 yari miliyari 3,35 Frw.

Ayasagutse mu 2023 ni miliyoni 707,06 Frw mu gihe mu 2022 yari miliyoni 720,87 Frw.

Muri iyi Nteko Rusange Isanzwe ya FERWAFA, hagaragajwe ko kugeza ku wa 31 Ukuboza 2023, iri Shyirahamwe ryari riberewemo imyenda ya miliyoni 817,97 Frw arimo miliyoni 770,09 Frw ya Minisiteri ya Siporo.

Mu kumara impungenge abanyarwanda,Perezida wa FERWAFA, Munyantwali Alphonse, yavuze ko batazakora ikosa ryo gukinisha umukinnyi [Umunya-Nigeria Ani Elijah cyangwa undi wese] mu gihe bitubahirije amategeko.

Ati "Abanyarwanda tubamare impungenge kandi tubahe amakuru; nta na rimwe tuzakinisha umukinnyi utujuje ibyangombwa biteganywa n’amategeko ya CAF cyangwa FIFA. Abagiye mu myitozo si ko bose bazagenda. Ni ibintu tuzitwararika."

Rwanda Premier League yemeje ko Shampiyona y’Icyiciro cya Mbere ya 2024/25 izatangira tariki ya 10 Kanama, isozwe ku ya 30 Gicurasi 2025.