Umunyamategeko akaba n’Umuvugizi wungirije wa FERWAFA, Jules Karangwa, yahamije ko rutahizamu wa APR FC, Byiringiro Lague akiri umukinnyi w’iyi kipe.
Ibi bije nyuma y’aho Ubuyobozi bwa Kiyovu Sports butanze ikirego muri FERWAFA na FIFA busabira APR FC gukurwaho amanota kuko bwakinishije umukinnyi utakiri uwa yo mu mukino iyi kipe yabatsinzemo ibitego 3-2.
Ibaruwa Kiyovu Sports yandikiye FERWAFA igira iti “Dukurikije amakuru tuvana mu Ikipe ya Sandvikens IF yo muri Suède, aho ku wa 26 (…)

Umunyamategeko akaba n’Umuvugizi wungirije wa FERWAFA, Jules Karangwa, yahamije ko rutahizamu wa APR FC, Byiringiro Lague akiri umukinnyi w’iyi kipe.

Ibi bije nyuma y’aho Ubuyobozi bwa Kiyovu Sports butanze ikirego muri FERWAFA na FIFA busabira APR FC gukurwaho amanota kuko bwakinishije umukinnyi utakiri uwa yo mu mukino iyi kipe yabatsinzemo ibitego 3-2.

Ibaruwa Kiyovu Sports yandikiye FERWAFA igira iti “Dukurikije amakuru tuvana mu Ikipe ya Sandvikens IF yo muri Suède, aho ku wa 26 Mutarama 2023 yatangaje kuri Twitter yayo ko Byiringiro Lague ari umukinnyi wayo byemewe n’amategeko, tukaba dusanga idakwiye guhabwa amanota y’umukino waduhuje na yo ku wa 28 Mutarama 2023.”

Umuvugizi wungirije wa FERWAFA, Jules Karangwa, yabwiye IGIHE dukesha iyi nkuru ko mu mategeko umukinnyi ataratangwa byemewe n’amategeko kuko iyo ntambwe itaraterwa.

Yagize ati "Umukinnyi mu rwego rw’amategeko akurwa mu ikipe imwe ajya mu yindi iyo asabiwe transfer agahabwa ITC imuvana mu gihugu yari arimo ajya mu kindi. Igihe ibyo byose bitarabaho aba ari muri icyo gihugu yemerewe gukina amarushanwa ya cyo.’’

‘’Ariko iyo ahawe ITC imuvana mu gihugu kimwe imujyana mu kindi ubwo aba akuwe muri gihugu yabarizwagamo, ntabwo aba yemerewe gukina amarushanwa yaho aba yemerewe gukina amarushanwa y’aho yaguzwe.’’

"Ibyo rero niba bitarabaho muri systeme ngo ikipe imusabe ahabwe ITC habeho iyo ntambwe yo kumwandikisha iwabo tukamukura hano iwacu. Nka twe muri FERWAFA ntabwo APR FC iramurekura [Byiringiro. Lague].’’

Yavuze ko ikibazo cyabaho mu gihe ikipe yasabye Lague, igahabwa ITC hanyuma agakomeza gukina mu Rwanda.

Byiringiro Lague ni umwe mu bakinyi bagaragaye mu mukino w’Umunsi wa 17 wa Shampiyona Kiyovu Sports yakiriyemo ikanatsindwa na APR FC ibitego 3-2 kuri Stade ya Muhanga ku wa Gatandatu, tariki 28 Mutarama 2023.

APR FC yatsindiwe na Niyibizi Ramadhan, Bizimana Yannick na Niyigena Clement mu gihe ibya Kiyovu Sports byinjijwe na Iradukunda Bertrand na Nshimirimana Ismael “Pitchou”.