Mu mukino w’umunsi wa 16 ubimburira indi yose yo kwishyura ya shampiyona,ikipe ya Gasogi United yatsinze Rayon Sports ibitego 2-1,kuri Kigali Pele Stadium.

Sponsored Ad

Muri uyu mukino Rayon Sports yajemo idafite abakinnyi bayo bakomoka muri Uganda barimo Joachiam Ojera na Charles Bbaale,yatsinzwe irushwa na Gasogi United wabonaga yo yariteguye cyane.

Iminota ya mbere y’umukino,Gasogi United yashyize igitutu kuri Rayon Sports bikubitiraho amakosa ateye ubwoba ya ba myugariro bayo yari menshi.

Gasogi United yahushije igitego cyabazwe ku munota wa 18,ubwo abakinnyi batatu ba Gasogi United basigaranaga n’izamu ryonyine ku mupira bari bambuye Kalisa Rashid,Kabanda Serge wari wenyine awuteye ukubita igiti cy’izamu uvamo.

Gasogi yakomeje gusatira ndetse ihusha ibindi bitego bibiri bya Lesere Cedric birimo icyabazwe yateye n’umutwe,umupira ugarurwa n’amaguru ya Bonheur.

Ubwugarizi bwa Rayon Sports bwongeye gukora amakosa ku munota wa 30,Muderi Akbar azamukana umupira asiga Nsabimana Aimable yinjira mu rubuga rw’amahina ahereza Kabanda Serge atsindira Gasogi United igitego cya mbere.

Iki gitego n’ubundi cyaje gitinze kuko Rayon Sports yari ku rwego rwo hasi,yihera imipira myiza abakinnyi ba Gasogi United bakarangara.

Uburyo bumwe Rayon Sports yabonye bukomeye mu gice cya mbere n’ubwo Gomis yarobye umunyezamu,myugariro wa Gasogi agarurira umupira ku murongo.

Amahitamo umutoza wa Rayon Sports yakoze mu ikipe yabanje yari mabi kuko hari abakinnyi bari hasi cyane nka Kalisa Rashid,Tuyisenge Arsene ndetse na Nsabimana Aimable wari inyuma y’abandi bitewe nuko amaze igihe kinini adakina.

Igice cya mbere cyarangiye ari igitego 1-0 cya Gasogi United.

Rayon Sports yatangiye igice cya kabiri ikora impinduka 3, Paul Gomis, Kalisa Rashid na Nsabimana Aimable bavamo basimburwa na Alsény Camara, Héritier Nzinga Luvumbu na Mitima Isaac.

Rayon Sports ntacyo yahinduye mu mikinire byatumye Gasogi United ibona igitego ku munota wa 56,umusifuzi asifura ko Mugisha Joseph wagitsinze yaraririye nubwo amashusho yagaragaje ko bitabaye.

Nyuma y’iminota 3 gusa, Gasogi United yaciye mu rihumye ubwugarizi bwa Rayon Sports, Kabanda Serge atsindira Gasogi United igitego cya kabiri ku mupira yahawe na Nkubana Marc Govin.

Ku munota wa 64,Rayon Sports yabonye kufura yatewe na Luvumbu, ariko umupira ukubita igiti cy’izamu urasohoka.

Guhera ku munota wa 70 Rayon Sports yagerageje gusatira no kurema amahirwe imbere y’izamu rya Gasogi ariko ntibyagira icyo bitanga.

Rayon Sports yabonye uburyo bwiza ku mupira waterewe kure na Muhire Kevin,umunyezamu wa Gasogi United awushyira muri Koloneri.

Ku munota wa 4 muri 6 yongewe kuri 90, Luvumbu yatsindiye Rayon Sports igitego cy’impozamarira kuri coup franc yakorewe kuri Mitima. Umukino warangiye ari ibitego 2-1.

Rayon Sports igumye ku mwanya wa 4 n’amanota 27 mu gihe APR FC ya mbere ifite amanota 33 n’umukino itarakina. Gasogi United n’iya 7 n’amanota 21.

Gahunda y’umunsi 16

Ku wa Gatanu tariki ya 12 Mutarama 2024

Rayon Sports 1-2 Gasogi United

Ku wa Gatandatu tariki ya 13 Mutarama 2024

Musanze FC vs Etoile del’Est
Bugesera FC vs AS Kigali
Mukura VS vs Amagaju FC
Gorilla FC vs Etincelles FC

Ku Cyumweru tariki ya 14 Mutarama 2024

Sunrise FC vs Police FC
Muhazi United vs Kiyovu Sports
APR FC VS Marines FC