Perezida wa Kiyovu Sports Association, Ndorimana Jean François Régis “Général”, yasezeraniye abakinnyi b’iyi kipe ko ibibazo bigiye gukemuka ndetse agiye kujya abahembera agahimbazamusyi mu rwambariro.

Mu mashusho yagiye hanze yagaragaje uyu muyobozi afashe amafaranga menshi y’agahimbazamusyi yari agiye guha abakinnyi.

Yabanje kubwira abakinnyi ati "Nubwo mu ikipe yacu harimo ibibazo ndangira ngo mbabwire ngo ibisubizo byabyo ngibi:umusaruro wo mu kibuga.

Ndagira ngo mbabwire ko umukino muzajya mukina,agahimbazamusyi muzajya mugahererwa hano.

Dufite byinshi turimo turakora.Ntawe uryamye muri twebwe kugira ngo tubone amafaranga ibibazo byanyu bikemuke."

Yakomeje ashishikariza abakinnyi gutsinda kuko ngo ’uwo ngezeho wese ndamubwira ngo ikipe yatsinze,nkagira icyo mukuraho.Mwihangane mushyire umutima ku kazi ibindi mubiturekere nka komite.

Icyo mbasezeranyije prime ni kuri stade."

Uyu yemeye ko babafitiye ikirarane cy’agahimbazamusyi k’umukino wa Gorilla FC batahawe kandi baratsinze.

Kiyovu Sports ifite amanota 12 muri shampiyona ndetse kuri uyu wa Gatanu barakina na Police FC.