Pep Guardiola yasabye abakinnyi be n’abandi bakozi b’ikipe ya Manchester City guhagurukira Erling Haaland bamuha icyubahiro mu kwizihiza umuhigo yaciye wo gutsinda ibitego byinshi mu mwaka umwe w’imikino wa Premier League – mu kwereka uyu rutahizamu ukuntu igikorwa yakoze cyihariye.
Igitego cya Haaland muri 3-0 Manchester City yatsinze West Ham, kivuze ko ubu afite ibitego 35 muri shampiyona uyu mwaka.
Yakuyeho umuhigo mbere wari usangiwe na Alan Shearer na Andy Cole.
Guardiola yagize (…)

Pep Guardiola yasabye abakinnyi be n’abandi bakozi b’ikipe ya Manchester City guhagurukira Erling Haaland bamuha icyubahiro mu kwizihiza umuhigo yaciye wo gutsinda ibitego byinshi mu mwaka umwe w’imikino wa Premier League – mu kwereka uyu rutahizamu ukuntu igikorwa yakoze cyihariye.

Igitego cya Haaland muri 3-0 Manchester City yatsinze West Ham, kivuze ko ubu afite ibitego 35 muri shampiyona uyu mwaka.

Yakuyeho umuhigo mbere wari usangiwe na Alan Shearer na Andy Cole.

Guardiola yagize ati: "Iyo ari umwanya wihariye, tugomba kwerekana ukuntu wihariye".

Igitego cya Haaland yatsinze arobye umunyezamu Lukasz Fabianski akamurenza umupira nyuma yo guherezwa na Jack Grealish, cyatumye ageza ku bitego 51 mu marushanwa yose muri uyu mwaka w’imikino.

Asigaje ibitego 12 kugira ngo ageze ku muhigo wa Dixie Dean wo gutsinda ibitego byinshi mu marushanwa yose mu mwaka w’imikino mu Bwongereza.

Abakinnyi bose bakinana n’uyu Munya-Norvège w’imyaka 22, hamwe na Guardiola ndetse n’abandi bakozi ba Manchester City, batonze umurongo nuko Haaland abanyura hagati mu kumuha icyubahiro, ubwo yerekezaga mu rwambariro.

Guardiola yagize ati: "Ateye ibyishimo.

"Buri muntu wese yishimiye kuba ari kumwe na twe. Uyu muhigo uzacibwa akatari kera, wenda ni we uzawuca mu gihe kiri imbere, kuko azatsinda ibitego byinshi. Ariko Andy Cole na Alan Shearer ni ba rutahizamu b’ibitangaza kandi ntekereza ko yari agikwiye [icyo cyubahiro]".

Haaland yasetse avuga ko uko kumuha icyubahiro "kwambabaje", abwira igitangazamakuru Sky Sports ati: "Buri muntu wese yankubise mu bitugu".

Shearer, mu gusubiza kuri Twitter umunyamakuru wa BBC Gary Lineker wahoze akinira ikipe y’igihugu y’Ubwongereza wari umubwiye, atebya, ko yifatanyije na we muri "iki gihe kigoye" cyo gutakaza umuhigo we, wari umaze imyaka 28, yagize ati:

"Nta wundi mwiza cyane najyaga kwifuza ko awuca... Ararenze".

Haaland yanagerageje kwirengagiza ibintu bikomeye yagezeho we nk’umukinnyi, yemera ko ibyo bitego byose yabitanga akabiha uwundi, bibaye ari icyo bisaba kugira ngo City itsindire ibikombe bitatu ubu irimo guhatanira kwegukana – ari byo igikombe cya Premier League, Champions League na FA Cup.

Yagize ati: "Buri muntu wese arabizi ko bishoboka, ariko ubu ntidushobora gutekereza ku mukino wa nyuma wa FA Cup na Manchester United".

Aho gutekereza ku guca uwo muhigo wa Dean, Haaland yavuze ko agiye mu rugo gukina imikino yo mu ikoranabuhanga (video games) atatinyuka kuvuga iyo ari iyo kuko byatuma abantu bamuseka.