Rutahizamu wa Manchester City, Erling Haaland,yabaye umukinnyi utsinze byihuse ibitego 50 mu mateka ya Premier League,kuko yabikoze mu mikino 48 gusa.

Akuyeho agahigo kari gafitwe na Andrew Cole wabitsinze mu mikino 65.

Kuri uyu wa gatandatu, Haaland yafunguye amazamu ku munota wa 27 mu mukino wa Premier League ikipe ya Man City yari yakiriyemo Liverpool,banganya igitego 1-1.

Liverpool yaje kwishyura iki gitego ibifashijwemo na Trent Alexander Arnold ku munota wa 78.

Ibi Haaland yabigezeho nyuma yo kubyaza umusaruro umupira mwiza yahawe na Nathan Aké.Iki kibaye igitego cya 18 Haaland yatsinze mu marushanwa yose muri uyu mwaka w’imikino.

Uyu mukinyi w’imyaka 23 niwe uza ku isonga muri ba rutahizamu batsinze ibitego 50 mu mikino mike mu mateka ya Premier League mu gihe abandi baza inyuma ye ari Alan Shearer (66), Ruud van Nistelrooy (68), Fernando Torres na Mohamed Salah (72).

Mu mwaka ushize,Haaland yatsinze ibitego 36 muri Premier League y’ubushize,akora agahigo ko gutsinda ibitego byinshi muri shampiyona imwe.

Uyu mukinnyi ukomoka mu gihugu cya Norway yerekeje muri City avuye muri Borussia Dortmund mu 2022,afasha iyi kipe kwegukana igikombe cya Premier League, Champions League ndetse na FA Cup mu mwaka ushize w’umukino.

Haaland agiye kwiruka kuri Shearer ku gahigo k’ibitego 100 muri Premier League yatsinze mu mikino 124.

Man City iracyayoboye Premier League uyu mwaka n’amanota 29 aho ikurikiwe na Liverpool n’amanota 28 na Arsenal ya 3 n’amanota 27.

Man City yabuze amahirwe yo kurenza imikino 23 itsindira ku kibuga cyayo Etihad.