Abanya Qatar barashaka gushora akayabo k’amamiliyari mu kugura ikipe ya Manchester United no guha umutoza Erik ten Hag buri kimwe kugira ngo azashore ku isoko agura abakinnyi b’ibitangaza.
Abaherwe bo muri Qatar barifuza kugura ikipe ya Man United iri ku isoko nyuma y’uko umuryango wa Glazer utangaje ko ushaka kuyirekura.
Dailymail iravuga ko hari itsinda ry’abaherwe bo muri Qatar bashaka kugura iyi kipe babona nk’igihangange muri ruhago.
Aba ngo baratanga igiciro cyabo mu minsi mike (…)

Abanya Qatar barashaka gushora akayabo k’amamiliyari mu kugura ikipe ya Manchester United no guha umutoza Erik ten Hag buri kimwe kugira ngo azashore ku isoko agura abakinnyi b’ibitangaza.

Abaherwe bo muri Qatar barifuza kugura ikipe ya Man United iri ku isoko nyuma y’uko umuryango wa Glazer utangaje ko ushaka kuyirekura.

Dailymail iravuga ko hari itsinda ry’abaherwe bo muri Qatar bashaka kugura iyi kipe babona nk’igihangange muri ruhago.

Aba ngo baratanga igiciro cyabo mu minsi mike mbere y’uko umunsi wa nyuma wo kwakira ibiciro uteganyijwe muri Gashyantare rwagati ugera.

Aba ngo biteze ko akayabo bazatanga kazakiranwa yombi n’umuryango wa Glazer ndetse ko nta n’uzabasha guhangana nabo.

Ba nyiri United barashaka arenga miliyari 6 z’amapawundi kandi ngo hari gahunda y’uko hazahita havugururwa stade ya Old Trafford,ndetse n’ibindi bikorwa bitandukanye birimo n’ikibuga cy’imyitozo.

Ibikorwa byo kuvugurura ngo bizatwara asaga miliyari ebyiri z’amapawundi kandi ngo aba banya Qatar nta kibazo cy’amafaranga bafite yo kubikora.

Aba banya Qatar bashobora kugorwa bikomeye no kugura Man United kuko basanzwe bafite ikipe ya Paris Saint-Germain.Itegeko rivuga ko kompanyi imwe itemerewe gutunga amakipe abiri mu irushanwa rimwe kandi ariya makipe yombi ashobora guhura mu mikino y’Uburayi.

Icyakora ngo abashobora kugura iyi kipe bashobora kuba batandukanye na Qatar Sports Investments ifite Paris Saint-Germain.

Aba ngo baramutse baguze United,bahita bazahita baha umutoza Ten Hag amafaranga ahagije kugira ngo agure abakinnyi bahenze ahanganye n’ibindi bigugu ku isi.

Uwahaye amakuru Mail yagize ati "Abo bantu bafite gahunda.Barashaka gutuma ikipe ya United iba aho igomba kuba iri kandi bizeye ko igiciro cyabo kizaba aricyo kiri hejuru.

Barashaka kubaka ikipe kugira ngo isubire ku rwego rwo hejuru ariko kandi barashaka ko ibi bikorwa ku neza y’abaturage.

Aba ngo barashaka guhangana n’abanya Abu Dhabi baheruka kugura Newcastle ndetse bashaka kuyigira igihangange.

Umuyobozi w’ikirenga "Emir" wa Qatar,Sheik Tamim bin Hamad Al Thani,afana Man United kandi ngo azi amateka yayo.Uyu ngo yashatse kugura United akayabo ka miliyari y’amapawundi muri 2011 ariko umuryango wa Glazers urabyanga.