Rutahizamu kabuhariwe akaba na kapiteni wa FC Barcelona ntabwo amerewe neza n’abafana ndete n’abakunzi b’iyi kipe ayoboye nyuma y’aho ananiwe kubigaragariza mu mukino batsinzwemo na Real Madrid ibitego 2-0.

Nubwo nta gahora gahanze,benshi batangiye kuvuga ko kujya mu ikipe ya Juventus kwa Cristiano Ronaldo kwamanuye guhatana kwa Messi muri El Classico kuko kuva yagenda muri 2018, Messi ntabwo aratsinda igitego cyangwa ngo atange umupira ukibyara muri uyu mukino urebwa na benshi kurusha iyindi ku isi.

Messi yakinnye iminota 90 ku Cyumweru ariko benshi baramushatse baramubura cyane ko n’uburyo bubiri bwo gutsinda igitego yabonye atabubyaje umusaruro.

Ntibyari bisanzwe ko Messi asigarana n’izamu kabiri ngo ahushe igitego ariko ku cyumweru niko byamugendekeye.Hashize imikino 5 atabona izamu muri El Clasico.

Messi nawe yemeye ko kugenda kwa Ronaldo kwasubije inyuma La Liga kuko ngo guhangana n’uyu munya Portugal byatumaga amakipe yabo yitwara neza.

Messi aheruka gutsinda igitego muri El Clasico muri Gicurasi 2018 ubwo Madrid yanganyaga na Barca ibitego 2-2.Na Cristiano yaratsinze muri uyu mukino.

Ronaldo yarebye umukino Real Madrid yatsinzemo FC Barcelona 2-0