Umukinnyi w’ikipe y’igihugu y’u Rwanda, Amavubi, Hakim Sahabo yatangajwe na AEK Athens FC ikina shampiyona y’icyiciro cya mbere mu Bugereki nyuma y’uko imutanzeho arenga Miliyari 2 z’Amanyarwanda.

AEK Athens yamutangaje binyuze ku mbuga nkoranyambaga ndetse inamuha ikaze muri rusange. Hakim Sahabo yasinyiye iyi kipe nyuma y’uko imutanzeho Miliyoni 1.5 y’Amayero, ni ukuvuga Miliyari 2 na Miliyoni 600 z’Amanyarwanda imukura muri Standard de Liège yo mu Bubiligi yakiniraga.

Uyu mukinnyi w’Amavubi yari yarageze muri Standard de Liège muri 2023 abanza kujya akinishwa mu bato, nyuma aza kuzamurwa mu ikipe ya mbere. Ariko ntabwo yigeze ahozaho ngo atsindire umwanya wo gukina bihoraho, bikaba byaratumye atizwa muri Beerschot amezi atandatu.

Hakim Sahabo w’imyaka 20 kuva ageze muri Standard de Liège amaze kuyikinira imikino 34 mu minota 1635. Muri AEK Athens asanzeyo undi mukinnyi witwa Razvan Marin bakinannye muri Standard de Liège. AEK Athens yashinzwe mu 1924 ikaba iri mu makipe afite ibikombe byinshi mu Bugereki birimo 32 bya shampiyona.

Hakim Sahabo yatangajwe nk’umukinnyi wa AEK Athens FC

Hakim Sahabo mu mwambaro wa AEK Athens FC

Hakim Sahabo yatanzweho arenga Miliyari 2 Frw