Umunya-Espagne, Carlos Alós Ferrer wari Umutoza w’Ikipe y’Igihugu ’Amavubi’, yasezeye kuri izi nshingano nyuma y’amezi ane gusa yongerewe amasezerano y’imyaka ibiri.

Miliyoni zisaga 210 z’amanyarwanda nizo zitanzwe kuri Carlos Alós mu mishahara y’amezi 15 yaranzwe no gutsindwa cyane ndetse agashya nuko yabonye intsinzi imwe!

Carlos Alós Ferrer yerekanywe nk’Umutoza w’Amavubi tariki 29 Werurwe 2022, asimbuye Mashami Vincent wari uyamaranye imyaka itanu guhera muri Kanama 2018 kugeza muri Werurwe 2022.

Mu mikino 12 (habariwemo n’iya gicuti) yatoje ikipe y’igihugu Amavubi, yatsinze umwe nawo wa gishuti, anganya 5 atsindwa 6,yinjije ibitego 4 yinjizwa 13.

Mu mezi 15 abaye mu Rwanda, umutoza Carlos Alòs acyuye imbumbe ya miliyoni 210 FRW.

Uyu mutoza buri kwezi yahembwaga amadolari ya Amerika ibihumbi 12 wakuba amezi 15 akagera ku bihumbi 180 by’amadolari bingana na kariya kayabo mu manyarwanda.

Uyu mutoza yishyurirwaga inzu yo kubamo,imodoka na lisansi ndetse akanahabwa agahimbazamusyi ku mikino yatsinze nubwo yakabonye rimwe gusa.

Uyu mutoza bivugwa ko yazanywe n’uwari Perezida wa FERWAFA,Nizeyimana Olivier,nta hantu amara igihe kirenga umwaka aho yatoje hose ndetse uyu munsi yatangaje ko yeguye ku nshingano ze kuri uyu wa 8 Kanama 2023.

Abinyujije mu butumwa yanditse kuri Instagram, uyu mugabo yavuze ko agiye gutangira umushinga mushya, yifuriza amahirwe Amavubi mu gihe kiri imbere.

Muminsi ishize nibwo amakuru yavugaga ko Carlos Ferrer yasabye FERWAFA ko yasesa amasezerano ku mpamvu ze bwite , gusa hakaba andi makuru avuga ko yabonye akandi kazi.