‎Impuzamashyirahamwe y’umupira w’amaguru ku Mugabane w’u Burayi (UEFA) irateganya gukora inama yihutirwa ishobora kuganirirwamo icyemezo gikomeye cyo kutitabira igikombe cy’isi kuva mu 2030, nyuma y’igitekerezo cya FIFA cyo kugurisha imigabane mu ishami rishya rizacunga ibikorwa by’ubucuruzi by’amarushanwa yayo akomeye.

Umwuka mubi hagati ya FIFA na UEFA ukomeje gufata indi ntera, aho Ishyirahamwe ry’Umupira w’Amaguru mu Bwongereza (FA) na ryo ryifatanyije n’andi mashyirahamwe mu kwamagana uburyo uyu mugambi wateguwe, rivuga ko ritigeze rigishwa inama cyangwa ngo rimenyeshwe mbere y’uko utangazwa.
‎
‎Impuzamashyirahamwe y’umupira w’amaguru ku Isi, FIFA yatangaje ko ishaka gushinga ishami ry’ubucuruzi rizajya ricunga amarushanwa akomeye arimo Igikombe cy’Isi n’Igikombe cy’Isi cy’Amakipe (Club World Cup), aho abashoramari bo hanze bazemererwa kugura imigabane mike muri iryo shami. Nk’uko FIFA ibivuga, amafaranga azava muri uwo mushinga azifashishwa mu kongera ishoramari mu iterambere ry’umupira w’amaguru ku Isi no kongera inkunga ihabwa abanyamuryango bayo, ku migabane yose.
‎
‎Icyakora, UEFA, FA na CONCACAF bavuga ko ikibazo atari amafaranga ahubwo ari uburyo icyemezo cyafashwe hadakurikijwe amahame y’imiyoborere n’ubwisungane hagati y’inzego ziyobora umupira w’amaguru.
‎
‎Ishyirahamwe ry’umupira w’amaguru mu Bwongereza FA ryagize riti: "Twatunguwe n’uyu mugambi kuko nta makuru twigeze tuwuhabwaho. Duhangayikishijwe cyane n’uko hatubahirijwe inzira zisanzwe z’ifatwa ry’ibyemezo."
‎
‎UEFA na yo yavuze ko FIFA yarenze umurongo, ihita ihamagarira ibihugu 55 biyigize gukora inama yihutirwa kugira ngo harebwe icyakorwa. Mu bintu bishobora kuganirwaho harimo no kutitabira Igikombe cy’Isi cya 2030, nubwo kugeza ubu nta cyemezo kirafatwa.
‎
‎Abasesenguzi bavuga ko igihe ibihugu byo ku Mugabane w’u Burayi byakwikura muri iri rushanwa, byaba ari igihombo gikomeye kuri FIFA kuko ari ho haturuka amakipe menshi akunzwe kandi akunze kwitwara neza mu Gikombe cy’Isi.
‎
‎Mu Gikombe cy’Isi giheruka, amakipe atandatu mu munani yageze muri 1/4 cy’irangiza yari ayo ku Mugabane w’u Burayi, ibintu bigaragaza uburemere bw’uruhare rwayo muri iri rushanwa.
‎
‎Ikindi gikomeje guteza impaka ni impungenge z’uko abashoramari bashobora kugira uruhare rukomeye mu byemezo birebana n’amarushanwa ya FIFA, harimo no kuyagura kurushaho ndetse no kuba bajya bagira uruhare ku gutuma hafatwa ibyemezo birimo akaboko kabo.

Ibi bije mu gihe hakomeje kuvugwa igitekerezo cyo kongera amakipe azitabira Igikombe cy’Isi cya 2030 akava kuri 48 akagera kuri 64, aho ibi bizakomeza kuremerera ingengabihe y’umupira w’amaguru ku Isi igitekerezo nacyo Isi ya ruhago itavugaho rumwe.
‎
‎Ku ruhande rwa FIFA, yo ishimangira ko n’ubwo hashyirwaho iri shami ry’ubucuruzi, ububasha bwo kuyobora umupira w’amaguru n’ibyemezo byose birebana n’amarushanwa bizakomeza kuguma mu maboko yayo.
‎
‎Mu gihe hategerejwe inama ya UEFA, abakunzi b’umupira w’amaguru ku isi bose bategereje ibyemezo bizavamo, kuko bishobora guhindura isura y’igikombe cy’isi cya 2030 ndetse n’umubano hagati ya FIFA n’impuzamashyirahamwe ziyigize.