Ikipe ya Chelsea iritegura kongera ingufu mu gushaka umunyezamu wa Arsenal, Aaron Ramsdale nyuma y’uko Robert Sanchez yagize imvune ubwo The Blues yatsindwaga na Everton ibitego 2-0.

Uyu munya Espagne Sanchez, ufite imyaka 26, yatangiye imikino 16 yose ya Premier League mu ikipe ya Mauricio Pochettino nyuma yo kugenda kwa Edouard Mendy muri Al-Ahli na Kepa Arrizabalaga watijwe muri Real Madrid.

Sanchez ubu yagiye ku ruhande nyuma yo kuvunika mu ivi agasimburwa ku munota wa 84 kuri Goodison Park ku cyumweru.

Umunyezamu Djordje Petrovic wageze muri iyi kipe mu mpeshyi avuye muri Revolution ya New York,niwe wamusimbuye asoza umukino.

Kuri uyu wa gatandatu, uyu munya Serbia, ufite imyaka 24,niwe ubanza mu kibuga mu mukino wa Premier League barakina naSheffield United.

Ariko Pochettino ashishikajwe no kongera imbaraga mu ikipe ye mu isoko rya Mutarama kandi umuzamu Ramsdale niwe ashaka.

Chelsea iri ku mwanya wa 12 ku rutonde rwa Premier League aho yatsinze imikino itanu gusa mu mikino 16 imaze gukinwa.

Ramsdale w’imyaka 25 washyizwe ku ntebe muri Arsenal mu ntangiriro z’uyu mwaka w’imikino,nyuma yo kuza kwa David Raya avuye i Brentford.

Uyu mwongereza yagaragaye mu mikino itanu gusa mu mikino 16 ya shampiyona muri Arsenal.

Bivugwa ko Mikel Arteta adashaka kumurekura mu kwa mbere kuko byatuma asigarana Karl Hein w’imyaka 21 nk’umuzamu usimbura.

Ikinyamakuru talkSPORT kivuga ko Chelsea ishaka kugura Ramsdale mu gihe na Newcastle imushaka.

Uyu munyezamu yazanwe na Arteta mu 2021 ubwo yavaga muri Sheffield United kuri miliyoni 30 z’ama pound.

Yakiniye iyi kipe imikino 87, atsindwa ibitego 96 kandi arangiza imikino 32 atinjijwe igitego.