Ikipe y’Igihugu ya Ghana y’abagore yanyagiye iy’u Rwanda ibitego 7-0 mu mukino ubanza mu gushaka itike y’Igikombe cya Afurika cy’abagore wabereye kuri Kigali Pele Stadium.

Ikipe y’u Rwanda yari hasi cyane yaba mu bijyanye n’ingufu ndetse no guhagarara neza mu kibuga,yanyagiwe na Ghana mu mukino washoboraga kubonekamo ibitego birenze ibi.

Ku munota wa kabiri w’umukino,nibwo Ghana yafunguye amazamu ku mupira wari uvuye muri koruneri, utsindwa na Doris Boaduwaa n’umutwe.

Ku munota wa 13,Evelyn Badu yatsinze igitego cya kabiri cya Ghana ku mupira yazamukanye neza, acenga Uwase Andersene n’umunyezamu Akimana.

Ku munota wa 27,Princella Adubea yatsindiye Ghana igitego cya gatatu ku mupira yateye n’umutwe.

Igice cya Mbere cyarangiye Ghana yatsinze u Rwanda ibitego 3-0.

Ku munota wa 53,Kusi Alice yatsindiye Ghana igitego cya kane ku mupira bahinduye imbere y’izamu,ba myugariro b’u Rwanda bananirwa kuwukuraho, awutera mu izamu.

Ku munota wa 64,Evelyn Badu yatsinze igitego cya gatanu cya Ghana ku ishoti rikomeye yatereye hanze y’urubuga rw’amahina,wijyana mu rushundura.

Ku munota wa 65, Jennifer Cudjoe yahushije penaliti ku mupira yateye uca ku ruhande rw’izamu ry’u Rwanda.

Ku munota wa 74,Anasthesia Achiaa yatsindiye Ghana igitego cya gatandatu ku mupira umunyezamu Ndakimana yananiwe gufata ngo awukomeze, uyu mukinnyi asongamo.

Ku munota wa 84,Anasthesia Achiaa yatsindiye Ghana igitego cya karindwi ku mupira yahinduye imbere y’izamu wijyana mu nshundura.

Umukino wo kwishyura uteganyijwe tariki 26 Nzeri 2023 muri Ghana.