Umukobwa ufatwa nk’ukurura abagabo kurusha abandi bose ku isi mu basiganwa ku ntera ngufi [sprinters] n’amaguru witwa Alicia Schmidt yasabye Erling Haaland kuzaza bagahangana mu gusiganwa kwiruka kuko ngo yamusiga.

Ubuhanga bwa Haaland n’imbaraga ze nibyo byatumye abasha gutsinda ibitego 52 mu mikino 53 yakinnye mu marushanwa yose mu mwaka w’imikino ushize.

Iki kizungerezi gikomoka mu Budage cyavuze ko Haaland atagitsinda basiganwe metero 400 ndetse uyu mukobwa arihariye kuko aziruka mu masegonda ari munsi ya 55.

Igitekerezo cyo guhangana na Haaland cyaje ubwo yasubizaga ibibazo by’abafana kuwa 21 ubwo yari muri shampiyona y’isi y’imikino ngororamubiri iri kubera i Budapest muri Hungary.

Aganira n’ikinyamakuru cyo muri Norway cyitwa Dagbladet,yabajijwe niba yatsinda kizigenza Haaland muri ziriya metero arabyemera.

Yagize ati "hmm ntabwo mbizi-birashoboka.Ndatekereza ko muri metero 400 nibyo.Muri 200 bishobora kugorana.

Yongeyeho ati "Nakwishima iryo rushanwa ribaye.

Abajijwe igihe iryo rushanwa rizabera,yagize ati "Ntabwo mbizi,ngomba kubanza kumubaza.Mpora niteguye.

Yahise areba muri Camera aravuga ati :"Rero, Haaland,uramutse ushaka kurushanwa nabyishimira.Reka turebe uwihuta cyane."

Ntabwo bwaba ari ubwa mbere uyu mukobwa asiganwe n’umukinnyi akamutsinda kuko muri 2021 yatsinze Mats Hummels ukinira BVB.