Ikipe ya APR FC igiye gucakirana na Pyramids FC mu ijonjora ry’ibanze rya CAF Champions League mu gihe imaze imyaka 8 idatsindirwa mu rugo muri iri rushanwa.

Kuri uyu wa Gatatu tariki ya mbere Ukwakira 2025 saa Munani kuri Kigali Pele Stadium ikipe ya APR FC irakira Pyramids FC yo mu Misi mu mukino ubanza w’ijonjora ry’ibanze rya rya CAF Champions League. Iyi kipe y’Ingabo z’igihugu ihagarariye u Rwanda muri iri rushanwa nyuma y’uko ariyo yegukanye igikombe cya shampiyona cy’umwaka ushize.

Icyo imibare ivuga mbere y’uko uyu mukino ukinwa

Muri rusange amateka yerekana ko APR FC imaze gukina imikino 72 ya CAF Champions League ikaba yaratsinzemo imikino 25, inganya 17 itsindwa 30. Iyi kipe y’Ingabo z’igihugu iheruka gutsindirwa mu rugo muri CAF Champions League taliki ya 2 Mutarama 2017 ubwo yatsindwaga na Zanaco FC igitego 1-0 bikaba byari mu mukino wo kwishyura w’ijonjora ry’ibanze.

APR FC na Pyramids ni ku nshuro ya 5 zigiye guhura. Mu mwaka ushize zahuriye mu ijonjora rya kabiri aho umukino ubanza amakipe yombi yanganyije 1-1 muri Stade Amahoro naho mu mukino wo kwishyura Pyramds FC iyitsinda ibitego 3-1.

Byari nyuma y’uko mu mwaka wari wabanje nabwo zari zahuye aho mu mukino ubanza wabereye mu Rwanda warangiye amakipe yombi anganya 0-0 naho mu mukino wo kwishyura wabereye mu Misiri ukaba wararangiye Pyramids FC itsinze ibitego 6-1.

Ni inshuro ya 16 APR FC igiye guhura n’amakipe yo mu Misiri ikaba yarashoboye gutsindamo umukino umwe wo muri 2004 ubwo yatsindaga Zamarek ibitego 4-1, inganya 4 itsindwa inshuro 9.

Mbere y’uko iri rushanwa rihuza amakipe yabaye aya mbere iwayo rya CAF Champions League rihindurwa izina rikiri African Cup Winners’ Cup, muri 2003 ikipe ya APR FC yakoze amateka igera muri 1/2. Icyo gihe muri 1/16 yari yasezereye US Kenya iyitsinze ibitego 9-2 muri rusange, muri 1/8 isezerera Etoile du Congo iyitsinze ibitego 5-1 mu mukino ubanza nuwo kwishyura, muri 1/4 isezerera Asante Kotoko banganyije ibitego 2-2 ariko igitego cyo hanze gikora itandukaniro naho muri 1/2 ikaba yari yahuye na Julius Berger ari nayo yayisezereye ku kinyuranyo cy’ibitego 3-2.

APR FC iracakirana na Pyramids FC kuri uyu wa Gatatu

Imibare igaragaza ko imyaka ibaye 8 APR idatsindirwa mu rugo muri CAF Champions League