Ikipe ya Inter Milan yari yakiriye Atletico Madrid mu mukino ugoranye wa 1/16 cy’irangiza muri UEFA Champions League, warangiye iyi kipe y’i Milan itsinze igitego 1-0 mu minota ya nyuma.

Sponsored Ad

Marko Arnautovic yishimiye iminota 45 yakinnye, nyuma yo kwinjira asimbuye Marcus Thuram mu gice cya kabiri cy’uyu mukino ubanza wa 1/16 cya Champions League ikipe ye ya Inter Milan yakiriye Atletico Madrid.

Arnautovic yahushije amahirwe yo gutsinda atatu akomeye, mbere y’uko atsindira Inter igitego ku munota wa 79, gishobora kuyifasha nigera i Madrid mu kwezi gutaha.

Alvaro Morata yagarutse mu kibuga avuye mu mvune y’ivi kuri Atletico mu gice cya kabiri, ariko ntabwo yari ameze neza, mu gihe Antoine Griezmann yasohotse mu kibuga afite imvune bigaragara ko biteye impungeng,e kuko ari ngenderwaho mu ikipe.

Inter yaherukaga kugera ku mukino wa nyuma wa Champions League, yari ikwiye intsinzi yayo, ariko muri iri rushanwa uba ukwiye gutsinda ku bitego byinshi, cyane ko urugendo rwo kuva kuri Stade Metropolitano rutazoroha kuko iyi kipe ya Diego Simeone yahatsindiwe rimwe gusa muri uyu mwaka w’imikino.

Muri uyu mukino,Atletico ntiyigeze itera ishoti rigana mu izamu mu gihe Inter yabikoze inshuro 19.

Mu wundi mukino wabaye muri Champions League,Ikipe ya PSV yanganyije igitego 1-1 na Borussia Dortmund mu mukino wabereye mu Buholandi.

Dortmund niyo yafunguye amazamu kare ku munota 24 ku gitego cyatsinzwe na Donyell Malen hanyuma iyi PSV yishyura ku munota wa 56 ibifashijwemo na penaliti ya Luuk de Jong.