Umunya-Cameroun Issa Hayatou wabaye Perezida w’Impuzamashyirahamwe y’Umupira w’Amaguru muri Afurika (CAF) hagati ya 1988 na 2017, akaba na Visi Peresida wa FIFA yitabye Imana azize ubuwayi ku myaka 77

Sponsored Ad

Hayatou yitabye Imana mu gihe yari kuzuza imyaka 78 kuri uyu wa Gatanu, akaba yaguye i Paris mu Bufaransa.

Uyu Munya-Cameroun yabaye Perezida wa CAF hagati ya 1988 na 2017,yabaye kandi Perezida w’inzibacyuho wa FIFA hagati ya 2015 na 2016 ubwo Sepp Blatter wari Umuyobozi yahagaritswe akurikiranyweho ibyaha bya ruswa. Yabaye kandi Perezida w’Ishyirahamwe ry’Umupira w’amaguru muri Cameroon (FECAFOOT) kuva mu 1986 kugeza mu 1988.

Ku ngoma ye ari Umuyobozi wa CAF Hayatou, yashyizeho irushanwa rya CHAN rikinwa n’amakipe y’ibihugu agakoresha abakinnyi bakına imbere mu gihugu.
Imiyoborere ye yaranzwe n’izamuka rya ruhago Nyafurika ariko ikemangwa mu ikoreshwa ry’amafaranga aho hari n’ayakoreshejwe mu kugira ngo akomeze kuyobora.

Hayatou wavukiye i Garoua, yahagaritswe mu bikorwa byose by’umupira w’amaguru na FIFA igihe cy’umwaka umwe mu 2021 kubera uburiganya yagize mu itangwa ry’isoko ryo kwerekana amashusho y’amarushanwa Nyafurika hagati ya 2014 na 2017.