Abakinnyi b’ikipe ya mbere ya Juventus ikomeje kugarizwa n’icyorezo cya COVID -19 giterwa na Coronavirus aho kuri uyu wa Kabiri umukinnyi wayo Blaise Matuidi nawe yapimwe agasanganwa iyi ndwara.

Nyuma y’aho myugariro Daniele Rugani asanganwe Coronavirus,umukinnyi mugenzi we wo hagati Blaise Matuidi ukomoka mu Bufaransa nawe yayisanganwe.

Ikipe ya Juventus yatangaje ko Blaise Matuidi yapimwe agasanganwa iyi ndwara gusa ntiyagaragaje ibimenyetso byayo kandi ngo ameze neza.

Matuidi w’imyaka 32 agiye gukurikiranwa n’abaganga cyane ko guhera kuwa 11 Werurwe yari yarishyize mu kato nyuma y’aho mugenzi we Rugani asanganwe Covid-19.

Mu gihugu cy’Ubutaliyani, abantu bagera ku 31,506 bamaze kwandura Coronavirus mu gihe abagera kuri 345 bishwe nayo.Ku isi yose abamaze kwandura Coronavirus ni 185,000 mu gihe imaze guhitana abagera ku 7,500 nkuko WHO yabitangaje.

Blaise Matuidi nawe yanduye Coronavirus