Komite Nyobozi ya Kiyovu Sports yahagaritse Kapiteni w’iyi kipe,Niyonzima Olivier Sefu imikino 6 ya shampiyona isigaye,bamushinja kutubaha ibiri mu masezerano.

Niyonzima Olivier Seifyahagaritswe imikino itandatu kubera imyitwarire mibi irimo kugumura abakinnyi yagaragaje mu minsi ishize.

Mu ibaruwa Kiyovu Sports yandikiye Seif,yavuze ko yananiwe kubahiriza ibiri mu masezerano bagiranye by’umwihariko mu ngingo ya kane.

Bagize bati: "Dushingiye ku myitwarire idahwitse ikomeje kukugaragaraho muri Kiyovu Sports,komite nyobozi ya Kiyovu Sports association nyuma yo kungurana ibitekerezo kuri iyo myitwarire,turakumenyesha ko utemerewe gukina imikino 6 ikurikiranye Kiyovu Sports club izakina uhereye tariki 10 Werurwe 2024."

Seif uhagarariye abakinnyi, si ubwa mbere muri uyu mwaka agiranye ikibazo na Komite Nyobozi, ahanini gituruka ku kwishyuza ibirarane iyi kipe iba ibafitiye.

Iyi kipe muri uyu mwaka w’imikino ifite ibibazo by’amikoro bikomeye, imaze amezi hafi 5 itabasha guhemba abakozi bayo.

Umukino uheruka bawukinnye nta myitozo bakoze, batsindwa na Etoile De L’Est igitego 1-0.

Urucaca rwahuye n’ikibazo gikomeye mu ntangiriro z’uyu mwaka w’imikino ubwo bishyuraga abanya-Sudan Shaiboub na John Mano n’umukongomani Vuvu arenga miliyoni 80 FRW.

Ubu Kiyovu yanafatiwe ibihano na FIFA byo kutagura abakinnyi kubera kwambura abari abakozi bayo mu bihe bitandukanye.

Sefu ari mu myitozo mu ikipe y’igihugu ifite imikino ibiri ya gicuti muri Madagascar, ari nawe mukinnyi wenyine wa Kiyovu wahamagawe mu ikipe y’igihugu iyo ariyo yose.