Umutoza wa Liverpool,Jurgen Klopp arifuza ko umukino wahuje ikipe ye na Tottenham,ukabamo kwibeshya gukomeye kwa VAR, wasubirwamo kuko kuri we ngo nibwo yumva ko haba habayeho ubutabera bwuzuye.

Uyu aravuga ibi nyuma y’amakosa akomeye ya VAR(Video Assistant Referee) yatumye ikipe ye itsindwa na Tottenham ibitego 2-1, nyamara habayemo kwangwa kw’igitego cy’umukinnyi we Luis Diaz.

Ikipe ya Reds yangiwe igitego nyuma y’uko abayobozi ba VAR bananiwe kubwira umusifuzi Simon Hooper ko igitego Luis Diaz yatsinze nta kurarira kwabayeho kikangwa.

Kuva uwo munsi,Ishyirahamwe ry’abasifuzi mu Bwongereza, PGMOL, ryasabye imbabazi z’iri kosa kandi risohora amajwi yose y’uko abasifuzi bavuganye kuri icyo gitego cyanzwe.

Klopp yababajwe n’ibyemezo byinshi byafatiwe muri uyu mukino birimo n’amakarita atukura yahawe, yemeza ko nta kandi karengane yabonye kameze nk’ako yahuye nako.

Klopp yagize ati: "Amajwi ntacyo yahindura na gato. Sinari nshishikajwe no kumenya impamvu ibintu byabaye. Nabonye ibyavuyemo, mbona igitego, twatsinze igitego.

Ni ngombwa ko tubyitwaramo neza mu buryo bukwiye. Ndashaka kuvuga ko abantu bose babigizemo uruhare, umusifuzi, abo ku ruhande, umusifuzi wa kane na VAR - ntabwo babikoze babigambiriye. Yego byari ikosa, ikosa rigaragara.

Ibi simbivuze nk’umutoza wa Liverpool ahubwo nk’umukunzi w’umupira w’amaguru - Ndatekereza ko igisubizo cyonyine cyaba kuwusubiramo. Birashoboka ko bitazabaho."

Abafana benshi nabo basabye ko umukino wongera gusubirwamo bitewe n’ubunini bw’ikosa rya VAR.