Komite Nyobozi ya FERWAFA yaseshwe nyuma y’uko IP Umutoni Claudette wari Komiseri ushinzwe Umutekano yeguye, byatumye abasigaye bari munsi y’umubare w’abagenwa n’amategeko ko bashobora gufata icyemezo.

Sponsored Ad

Kuri uyu wa Kabiri, tariki ya 9 Gicurasi 2023, ni bwo Visi Perezida wa FERWAFA, Habyarimana Marcel, yamenyesheje abanyamuryango ko IP Umutoni Claudette wari Komiseri w’Umutekano yeguye.

Yakomeje agira ati "Dushingiye ku ngingo ya 42 y’Amategeko Shingiro ya FERWAFA mu gika cyayo cya 7, dushingiye ku ngingo ya 38 y’Amategeko Shingiro, tunejejwe no kubatumira mu Nama y’Inteko Rusange Idasanzwe tariki ya 15 Gicurasi 2023."

Yongeyeho ko iyi Nteko Rusange izaba igamije kugaragariza abanyamuryango ubwegure bwa bamwe mu bari bagize Komite Nyobozi ya FERWAFA, kugena uko inzibacyuho izakorwa mbere y’amatora azaba ku wa 24 Kamena 2023 no kubamenyesha gahunda y’ibikorwa by’amatora.

Ibaruwa y’ubwegure bwa IP Umutoni yanditswe ku wa Mbere, tariki ya 8 Gicurasi, akaba yiyongereye ku bandi bari bagize Komite Nyobozi ya FERWAFA barimo Nizeyimana Mugabo Olivier wari Perezida, weguye ku wa 19 Mata.

Hari kandi Habiyakare Chantal wari Komiseri w’Imari weguye ku wa 21 Mata na Uwanyiligira Delphine wari Komiseri ushinzwe Amategeko weguye ku wa 20 Mata 2023.

Kwegura kwa Umutoni kuje gusanga amakuru avuga ko Munyantwali Alphonse uherutse kugirwa Perezida wa Police FC, aziyamamariza kuyobora FERWAFA.

IP Umutoni yari asanzwe yaratanzwe na Police FC ndetse nta kipe ishobora kugira abantu barenze umwe muri Komite Nyobozi ya FERWAFA.