Rutahizamu w’umufaransa ukina muri Real Madrid, Kylian Mbappe yiyunze ku barimo Lionel Messi na Cristiano Ronaldo batsinze ibitego biri hejuru ya 23 mu mikino 23 ya Laliga.

Ibi Kylian Mbappe yabigezeho mu ijoro rya cyeye tariki 8 Gashyantare 2026, mu mukino Real Madrid yatsinzemo Valencia ibitego 2-0.

Muri uyu mukino rutahizamu Kylian Mbappe yatsinzemo igitego cya kabiri ku munota wa 91, cyaje gikurikiye icyatsinzwe na Alvaro Carreras ku munota wa 65.

Iki gitego Kylian Mbappe yatsinze cyabaye igitego cya 23 atsinze muri Shampiyona ya Espagne uyu mwaka w’imikino. Kylian Mbappe kandi afite ibitego 13 muri UEFA Champions League.

Ibitego 23 Kylian Mbappe yabyujuje mu mikino 23 ya Laliga imaze gukinwa bituma yiyunga kuri Lionel Messi, Cristiano Ronaldo, Luis Suarez nabo batsinze ibi bitego birenga 23 mu mikino 23 ya Shampiyona ya Espagne. Lionel Messi yabikoze muri Saison ya 2012/2023, Cristiano Ronaldo abikora muri Saison ya 2014/2015, Luis Suarez yabikoze muri 2015/2016, byongeye gukorwa na Kylian Mbappe muri iyi Saison.

Kylian Mbappe akomeje gufasha ikipe ye ya Real Madrid kuko kugeza ubu irimo guhatana na FC Barcelona ku gikombe cya Laliga kuko iri ku mwanya wa 2 n’amanota 57 irushwa inota rimwe. Iyi kipe kandi yabonye itike yo gukina imikino ya kamparamaka ya UEFA Champions League aho itegereje kuzahura na Benfica FC.