Kabuhariwe Lionel Messi yatsinze ibitego 3 muri 4-2 batsinze ikipe ya Deportivo La Coruna,bituma FC Barcelona yegukana igikombe cya shampiyona La Liga ku nshuro ya 25, aho uyu munya Argentina yahise atangaza ko bari hejuru y’amakipe yose muri Espagne.

Messi yaraye yongeye kwerekana ko ari kabuhariwe ubwo yatsindaga ibitego 3 mu mukino batsinzemo Deportivo ndetse afasha ikipe ya FC Barcelona kwegukana La Liga,hasigaye imikino 4 yo gukina.

Ikipe ya FC Barcelona itwaye iki gikombe idatsinzwe umukino n’umwe ndetse byitezwe ko muri iyi mikino ishobora kurinda aka gahigo kayo nubwo igomba kwakira Real Madrid mu mpera z’iki Cyumweru.

Nyuma yo gutwara iki gikombe cya shampiyona,Lionel Messi yavuze ko ikipe ya FC Barcelona uyu mwaka yari hejuru y’amakipe bari bahanganiye iyi shampiyona kuko nta kipe n’imwe yigeze ibatsinda.

Yagize ati “Turishimye cyane kuba tubashije gutwara igikombe cya shampiyona La Liga.Twari hejuru y’amakipe twari duhanganye muri shampiyona kuko dutwaye igikombe tutaratsindwa.Gutwara igikombe cya shampiyona biragorana gusa kugitwara udatsinzwe ni ibintu bidasanzwe.

Ibitego 3 Messi yaraye atsinze,byatumye akora agahigo ko kuba umukinnyi wa mbere ubashije gutsinda ibitego birenga 30 muri shampiyona 7 zikurikiranya.