Uwahoze ari umutoza wongerera ingufu abakinnyi ba Rayon Sports Lomami Marcel yashinje ubuyobozi bw’iyi kipe kumwambura ibirarane by’imishahara y’amezi 4 bwari bumurimo mbere yo kumwirukana we n’abandi batoza barimo Jannot Witakenge na Ivan Minnaert.

Sponsored Ad

Lomami Marcel yabwiye abanyamakuru ba Radio Flash ko birukanwe mu buryo bugayitse,ntibahabwe ibyo bagomba ndetse n’ibirarane by’imishahara y’amezi 4 bari baberewemo ntibarabihabwa kugeza magingo aya.

Lomami Marcel na bagenzi be birukanwe kubera umwiryane batezaga mu ikipe ya Rayon Sports

Yagize ati “Ikibazo cyacu ubuyobozi bwa Rayon Sports burakizi nubwo bucyirengagiza.Ibyabaye murabizi baraduhamagaye batubwira ko baduhagaritse badushinja umusaruro muke no kutumvikana muri staff.Ibyo batugombaga ni byinshi,nabo barabizi n’uko batari kubyitaho.Iyo umuntu yirukanwe mu ikipe afite amasezerano ,hari ibyo amasezerano aba avuga agomba guhabwa,ni uko bajya babica inyuma ntibashake kubitanga.Mpamagara abayobozi ba Rayon Sports bakanga kunyitaba.Urebye muri Club ni ikibazo cy’imishahara igera ku mezi 4 n’ibyo amasezerano avuga,ntabwo navuga ku duhimbazamusyi tw’imikino twagiye dutsinda gusa dutegereje ko hari icyo ubuyobozi bwa Rayon Sports butugenera.

Twarabakoreye cyane barabizi nubwo bakomeza kwirengagiza ibyo bibazo byose.Nzi y’uko hari aamfaranga ikipe itugomba dutegereje kureba niba ubuypobozi buzagira icyo bukora kandi ndabizi bizasobanuka.Badufashe nk’abantu bo mu muhanda,twebwe abatoza badufashe nk’abantu bo hasi biratubabaza ndetse twabibwiye perezida wa Rayon Sports.”


Muvunyi niwe wahagaritse Lomami na bagenzi be

Nyuma yo kugenda kwa Karekezi Olivier mu Ukuboza umwaka ushize,Lomami Marcel niwe watoje umukino wa Mukura VS banganyije 0-0,nyuma ikipe izana Witakenge na Minnaert bafasha Rayon Sports kwerekeza mu matsinda ya CAF Confederations Cup.

Ku wa 11 Kamena 2018 nibwo ubuyobozi bwa Rayon Sports buyobowe na Muvunyi Paul bwafashe umwanzuro wo guhagarika abatoza babo batatu barimo Ivan Minnaert, Lomami Marcel ndetse na Jeannot Witakenge kubera ubwumvikane buke bari bafitanye bigatuma ikipe itsindwa.

Rayon Sports ntiyigeze igira icyo itangaza kuri ibi bintu ishinjwa na Lomami Marcel ariyo mpamvu Umuryango ukomeje kubakurikiranira icyo ubuyobozi bw’iyi kipe iri kwitegura umukino wa Enyimba FC bubivugaho.

Lomami Marcel wari umaze amezi asaga 3 nta kazi afite, yagizwe umutoza w’agateganyo muri Unity y’i Gasogi aho ashobora kugirwa umusimbura wa Gatera Moussa nk’umutoza mukuru mu ikipe ya Unity SC y’i Gasogi.