Ikipe ya Manchester City yabaye ikipe yihuse cyane kugeza ku bitego 250 muri Champions League ndetse ibimburira izindi kugera muri 1/16 cy’iri rushanwa muri uyu mwaka w’imikino wa 2023/2024.

Kuri uyu wa Kabiri, tariki ya 7 Ugushyingo, hakinwe Umunsi wa Kane w’amatsinda ya UEFA Champions League kuva mu Itsinda E kugeza mu Itsinda H.

Rutahizamu Erling Haaland akomeje kuba indirimbo kuri Etihad nyuma yo gutsinda ibitego bibiri muri 3-0 batsinze Young Boys kuri uyu wa kabiri muri Champions League.

Uyu rutahizamu watsinze igitego akacyishimira nkuko Didier Drogba yabigenzaga,yafashije Man City kwerekeza mu kindi kiciro nubwo hakiri indi mikino ibiri yo gukina.

Erling Haaland yatsinze ibitego bibiri birimo kimwe cya penaliti mu giheikindi cyinjijwe na Phil Foden byafashije Manchester City gutsindira Young Boys y’abakinnyi 10, ibitego 3-0.

Iyi kipe yo mu Bwongereza yahise iba iya mbere ibonye itike ya 1/8 kuko yagize amanota 12 kuri 12 mu Itsinda G, izamukana na RB Leipzig yagize amanota icyenda nyuma yo gutsindira FK Crvena Zvezda iwayo ibitego 2-1. Andi makipe yo muri iri tsinda, yombi afite inota rimwe mu gihe hasigaye imikino ibiri y’amanota atandatu.

Ikipe ya Man City yabaye ikipe ya 12 igejeje ku bitego 250 muri UEFA Champions League gusa yakoze agahigo ko kubigeraho mu mikino mike kurusha izindi zose kuko yabikoze mu mikino 119 gusa.

Ikipe ya City imaze imikino 17 yikurikiranya idatsindwa kandi yatsinze imikino yose yakiniye kuri Etihad muri uyu mwaka uko ari 23.

Undi mukino wari utegerejwe na benshi ni uwo Milan AC yakiriyemo Paris Saint-Germain mu Butaliyani, yitwara neza itsinda ibitego 2-1 byombi byinjiye mu bice byombi by’iminota yakinwe.

PSG yari yafunguye amazamu ku gitego cyinjijwe na Milan Skriniar ku mupira wahinduwe na Marquinhos ku munota wa cyenda, ariko yishyurwa na Rafael Leão nyuma y’iminota itatu.

Byasabye gutegereza umunota wa 50, Milan AC ibona igitego cya kabiri cyatsinzwe na Olivier Giroud n’umutwe ku mupira wahinduwe na Theo Hernández, aroba umunyezamu Gianluigi Donnarumma.

Muri iri Tsinda F, Borussia Dortmund yafashe umwanya wa mbere n’amanota arindwi nyuma yo gutsinda Newcastle United ibitego 2-0, PSG ijya ku mwanya wa kabiri n’amanota atandatu, mu gihe Milan AC yagize amanota atanu, ikurikiwe n’ikipe yo mu Bwongereza ifite amanota ane.

Mu yindi mikino yabaye, Atlético Madrid yagize amanota umunani mu Itsinda E nyuma yo kunyagira Celtic y’abakinnyi 10 ibitego 6-0, ikurikirwa na Lazio yagize amanota arindwi itsinze Feyenoord igitego 1-0.

Nubwo yatsinzwe na Shakhtar Donetsk igitego 1-0, FC Barcelone yakomeje kuyobora Itsinda H n’amanota icyenda, iyanganya na FC Porto yo yatsinze Royal Antwerp ibitego 2-0.

Imikino iteganyijwe ku wa Gatatu, tariki ya 8 Ugushyingo (saa 22:00)

Itsinda A:

Bayern Munich vs Galatasaray
FC Copenhagen vs Manchester United

Itsinda B:

Arsenal vs Sevilla CF
PSV Eindhoven vs Lens
Itsinda C:

Napoli vs Union Berlin (19:45)
Real Madrid vs SC Braga

Itsinda D:

Real Sociedad vs Benfica (19:45)
FC Salzburg vs Inter