Ikipe ya Manchester City irashaka gutanga Raheem Sterling na Gabriel Jesus muri Tottenham kugira ngo iyi kipe yo mu mujyi wa London nayo ibahe Harry Kane.

Iyi kipe iheruka kwegukana Premier League irashaka rutahizamu usimbura Sergio Aguero ariyo mpamvu ihanze amaso Harry Kane uheruka gusaba Tottenham ko yamurekura.

Kane w’imyaka 27 arashaka kujya mu ikipe itwara ibikombe ariyo mpamvu yasabye Tottenham kumurekura akigendera.

Uyu rutahizamu w’Umwongereza ukomeye,aheruka gutangaza ko yifuza gukinana n’Umubiligi Kevin de Bruyne ufite ubuhanga mu gutanga imipira ibyara ibitego.

Abafana ba Tottenham bamereye nabi umuyobozi w’ikipe Daniel Levy,kubera kongera kurangiza umwaka nta gikombe batwaye ndetse no kuba yari yashyize ikipe mu irushanwa rya Super League ritavuzweho rumwe.

Uyu muyobozi nawe yashatse ingingo imurengera aho ashaka kugarura umutoza Mauricio Pochettino kugira ngo amufashe kugumana Kane.

City ishaka rutahizamu,irashaka guha Tottenham abakinnyi bayo bakina imbere barimo Sterling na Jesus kugira ngo ibone Kane.

The Sun ivuga ko Pep Guardiola ashaka kurekura aba bakinnyi muri iyi mpeshyi kugira ngo abone uyu rutahizamu wamufasha kongera imbaraga I Burayi cyane ko aherutse gutsindirwa ku mukino wa nyuma wa Champions League.

Sterling amaze yatsinze ibitego 15 mu marushanwa yose mu mwaka w’imikino ushize ariko ntagihabwa agaciro kubera umwana muto Phil Foden