Ikipe ya Manchester City yamaze gutangaza ku mugaragaro ko yasinyishije umunya Croatia,Josko Gvardiol kuri miliyoni 78 z’amapawundi imukuye muri RB Leipzig.

Uyu munya Croatia w’imyaka 21 yasinye amasezerano y’imyaka itanu nyuma y’igihe ashimwa cyane kubera ubuhanga yagaragaje mu gikombe cy’isi cyabereye muri Qatar.

Iki giciro cyaguzwe Gvardiol cyatumye aba myugariro wa kabiri uhenze mu mateka y’isi nyuma ya Harry Maguire waguzwe na Manchester United miliyoni 80 z’amapawundi muri 2019.

Uyu n’umukinnyi wa kabiri Man City iguze nyuma y’undi munya Croatia,Mateo Kovacic yakuye muri Chelsea kuri miliyoni 30 z’amapawundi.

Gvardiol uzambara nimero 24, ntabwo bizwi igihe azatangirira gukira ariko birakekwa ko ashobora guhabwa amahirwe na Guardiola agakina na Arsenal muri Community Shield kuri iki cyumweru.

Akimara kugera Etihad, yagize ati: "Nahoranye inzozi zo gukina mu Bwongereza none kubigeraho hamwe na Manchester City -nyuma y’umwaka bagize-ni icyubahiro kuri njye.

Uwabonye Man City ikina umwaka ushize,arabizi ko ariyo kipe ya mbere ku isi.Gutwara ibikombe bitatu bisobanuye byose ukeneye kumenya ku buhanga iyi kipe ifite."

Uyu yavuze ko gukorana na Pep Guardiola,nabyo bizaba ari ibintu byiza kuri we.

Gvardiol yakinnye imikino 88 muri Leipzig ayifasha kwegukana ibikombe bibiri by’igihugu kandi yaje mu ikipe y’umwaka ya Bundesliga ya 2022/23.