Manchester City yatsinze Liverpool ibitego 2-1 mu mukino w’umunsi wa 25 wa Shampiyona y’u Bwongereza (Premier League) wabaye ku Cyumweru, tariki 8 Gashyantare 2026 kuri Anfield Road.

Wari umukino ukomeye hagati y’impande zombi, aho Machester City yifuzaga gutsinda igakomeza kwiruka inyuma ya Arsenal iyoboye, mu gihe Liverpool nayo yabonaa intsinzi yo kuyifasha gukomeza kuzamuka ku rutonde rwa Shampiyona.

Ni umukino watangiye wihuta ku mpande zombi, umupira uva ku izamu rimwe ujya ku rindi.

Mu minota 20, Manchester City yihariye umupira hagati mu kibuga, isatira izamu rya Liverpool abarimo Omar Marmoush na Antione Semenyo ntibabyaze umusauro uburyo babonaga.

Mu minota 30, Liverpool yinjiye mu mukino itangira gusatira bikomeye Manchester City binyuze mu bakinnyi barimo Mohammed Salah na Hugo Ekiitike.

Igice cya mbere cyarangiye amakipe yombi anganyije ubusa ku busa.

Liverpool yagarukanye imbaraga nyinshi mu gice cya kabiri isatira bikomeye izamu rya Manchester City harimo uburyo bukomeye bwahushijwe na Hugo Ekiitike ku ishoti yateye ari wenyine imbere, rinyura ku ruhande rw’izamu.

Iyi Kipe yakomeje gukina neza ndetse ku munota wa 64, yashoboraga gufungura amazamu ku mupira wazamukanywe na Hugo Ekiitike, awuha Florian Wirtz wari uhagaze neza ateye ishoti rikomeye rikurwamo na Marc Guehi, umupira ujya muri Konuneri itagize icyo itanga.

Ku munota wa 74, Liverpool yafunguye amazamu kuri Coup Franc nziza yatewe na Dominik Szoboszlai ari muri metero 32, imanukira mu izamu.

Nyuma yo gutsindwa igitego, Manchester City yikubise agashyi itangira gusatira izamu rya Liverpool ishaka igitego cyo kwishyura.

Byasabye gutegereza ku munota wa 83 ku gitego cyatsinzwe na Bernado Silva ku mupira mwiza yaherejwe n’umutwe na Erling Haaland, akozaho ikirenge uruhukira mu rushundura.

Mbere y’uko umukino urangira umusifuzi wa kane yongeyeho iminota irindwi y’inyongera.

Ku munota wa 90+1, Umunyezamu wa Liverpool Alison Becker yateze mu rubuga rw’amahina Matheus Nunes, umusifuzi yemeza ari penaliti.

Iyo penaliti yinjijwe na rutahizamu na Erling Haaland atsindira Manchester City igitego cya kabiri.

Ku munota wa 90+9, Gianluigi Donnarumma yarokoye Manchester City yashoboraga gutsindwa igitego cyo kwishyura ku ishoti rikomeye ryatewe na Alexis Mac Allister, ashyira umupira muri koruneri.

Ku munota wa 90+10’ Liverpool yasigaranye abakinnyi 10 nyuma yuko Dominik Szoboszlai yeretswe ikarita itukura ku ikosa yari akoreye kuri Erling Haaland amubuza gutsinda igitego cya gatatu.

Umukino warangiye Manchester City yatsinze Liverpooll ibitego 2-1, yongera kuyitsindira iwayo nyuma y’imyaka 23.

The Citizens yagumye ku mwanya wa kabiri n’amanota 50 irushwa atandatu na Arsenal ya mbere, mu gihe Liverpool iri ku mwanya wa gatandatu n’amanota 39.

Undi mukino wabaye kuri iki Cyumweru, Cyrstal Palace yatsinze Brighton igitego 1-0.

Dominik Szoboszlai yateye Coup franc anziza ri muri metero 32

Dominik Szoboszlai yishimira igitego yatsinze

Alison Becker yatabaye Liverpool mu minota ya mbere y’umukino akuramo umupira wa Erling Haaland

Erling Haaland yatsinze igitego cya mbere kuri Anfield Road ku nshuro ya mbere

Bernardo Silva ni we wishyuriye Manchester City igitego cya mbere
Erling Haaland yishimira igitego yatsinze kuri penaliti mu minota ya nyuma y’umukino

Gianluigi Donnarumma yatabaye Manchester City mu minota ya nyuma akuramo ishoti rikomeye ryari kuvamo igitego cyo kwishyura cya Liverpool

Pep Guardiola utoza Manchester City ntiyumva ibibaye nyuma yo gutsinda mu minota ya nyuma