Ikipe ya Manchester City yegukanye igikombe cya shampiyona y’Ubwongereza “Premier League 2020/2021,nyuma y’aho ikipe ya Leicester itsinze Manchester United ibitego 2-1 mu mukino wabaye mu ijoro ryo kuri uyu wa kabiri.

Ikipe ya Manchester City yegukanye iki gikombe ku nshuro ya 3 mu myaka 4 ishize bishimangira ubukombe bwayo ndetse n’ubuhanga bwa Pep Guardiola mu kubaka iyi kipe yahoze iciriritse mbere yo kugurwa n’Abarabu.

Ikipe ya Pep Guardiola yongeye iki gikombe kuri Carabao Cup ndetse iri ku mukino wa nyuma wa UEFA Champions League izahanganamo na Chelsea kuwa 29 z’uku kwezi.

Manchester City yagombaga gutwara iki gikombe mu mpera z’icyumweru gishize ariko yaje gutsindwa na Chelsea bituma itegereza ijoro ryakeye.

Kuri uyu wa kabiri,Leicester City yatsinze Manchester United ibitego 2-1 ibifashijwemo na Luke Thomas na Caglar Soyuncu mu gihe United yatsindiwe na Mason Greenwood.

Iki ni igikombe cya 9 cya shampiyona Pep Guardiola atwaye nyuma yo gutwara 3 muri Barcelona, 3 muri Bayern Munich na 3 muri City.

City yatangiye nabi umwaka w’imikino ku buryo ntawayihaga amahirwe yo kwegukana shampiyona ariko yaje gukosora amakosa yakoze igaruka mu bihe byiza biyihesha amahirwe mu marushanwa yose yakinnye uyu mwaka.

Imikino yitwayemo nabi harimo uwo yatsindiwe mu rugo na Leicester ibitego 5-2 ndetse inatakaza amanota kuri Leeds, West Ham and Liverpool, inatsindwa 2-0 na Tottenham.

Nyuma y’aho yaje kumara imikino 19 idatsindwa ihereye ku mukino yatsinzemo Burnley ibitego 5-0 kuwa 28 Ugushyingo 2020.Yakomeje kwitwara neza kugeza kuwa 7 Werurwe uyu mwaka ubwo yatsindwaga na United 2-0.

City isigaje imikino 4 kugira ngo isoze umwaka w’imikino irimo uwa Newcastle United (A),Brighton (A),Everton (H) na Chelsea ku mukino wa nyuma wa Champions League.