Ikipe ya Manchester United irashaka kugarura umunyabigwi wayo Cristiano Ronaldo aho ishaka kumugurana Umufaransa Paul Pogba nawe wakiniye Juventus mbere y’uko agaruka mu Bwongereza.

Ibinyamakuru byo mu Butaliyani biravuga ko Ronaldo yifuza kugaruka mu Bwongereza ndetse Manchester United yakinnyemo kuva 2003-2009 irashaka kumusubirana ariko itanze Paul Pogba muri Juventus akinira.

Ahazaza ha Ronaldo muri Juventus ntabwo hazwi neza cyane ko bivugwa ko uyu munyabigwi mu mupira w’amaguru yamaze gusezera bagenzi be bakinana muri Juventus.

Juventus yananiwe gufasha Cristiano Ronaldo kwegukana Champions League mu myaka 3 ayimazemo nubwo yatwaye Serie A ndetse uyu mwaka batwaye ibikombe 2.

Ikinyamakuru La Gazzetta dello sport kivuga ko yaba Ronaldo na Pogba bose bifuza gusubira mu makipe bahoze bakinira gusa Ronaldo biramusaba kugabanya umushahara.

Massimiliano Allegri yagaruwe muri Juventus ndetse hari amakuru avuga ko uyu mutoza ashobora kuba atifuza kugumana Cristiano Ronaldo.

Amakipe 2 yifuza Ronaldo arimo Manchester United na PSG ariko iyi kipe yo mu Bufaransa ngo niyo imushaka cyane kugira ngo asimbure Kylian Mbappe.

Ntabwo United iratangaza ko ishaka kurekura uyu mukinnyi wayo wo hagati kugira ngo ibone Ronaldo ugeze ku myaka 36.