Ikipe ya Manchester United yatangaje ko yamaze kumvikana na Real Madrid kuri myugariro Raphael Varane aho byamaze kwemezwa ko azakinira iyi kipe y’ubukombe mu Bwongereza mu mwaka w’imikino utaha.

Sponsored Ad

Uyu myugariro w’imyaka 28 wari umaze imyaka 10 muri Real Madrid,yahisemo kwerekeza muri Manchester United kugira ngo akine muri shampiyona y’Ubwongereza “Premier League”.

Varane yari asigaje umwaka umwe w’amasezerano muri Real Madrid ariko ngo yari yaranze kongererwa amasezerano mashya.

Hari hamaze iminsi inkuru zivuga ko uyu mukinnyi yamaze kumvikana na United ariko uyu munsi nibwo iyi kipe yabyemeje ku mbuga nkoranyambaga zabo.

Yagize ati “Manchester United yishimiye gutangaza ko yamaze kumvikana na Real Madrid ku kugura myugariro mpuzamahanga w’Umufaransa watwaye igikombe cy’isi, Raphael Varane….”

Real Madrid nayo yemeye ko yamaze kugurisha uyu myugariro wayo utarashimishije abafana umwaka ushize muri Champions League kubera amakosa yakoze gusa mu myaka 10 yayikiniye yakoze ibyiza byinshi we na mugenzi we Sergio Ramos bagendeye rimwe.

Real Madrid yashimiye bikomeye Varane.Iti “Ikipe yacu igushimiye ubunyamwuga bwawe n’imyitwarire yawe y’intangarugero mu myaka 10 wambaye umupira wacu,unatwara ibikombe 18.”

Varane arasinya amasezerano y’imyaka 4 muri United ishobora kongerwaho umwe ndetse bivugwa ko yaguzwe miliyoni 34.5 z’amapawundi ziziyongeraho izindi bitewe nuko yitwaye zikagera kuri 42.7.

Ikipe ya Chelsea nayo irashaka kugera ikirenge mu cya United ikagura myugariro mushya aho amakuru yatangajwe ari uko yamaze kumvikana na Sevilla kuri myugariro wayo Jules Koundé.

Uyu myugariro azasinyira Chelsea amasezerano azamugeza 2026 hanyuma Chelsea nayo yemeye guha Sevilla myugariro wayo Kourt Zouma nk’ingurane ndetse yongereho amafaranga.Kounde yari mu Bufaransa bwitabiriye Euro 2020.

Byinshi ku myaka 10 Varane amaze muri Real Madrid

Iminota: 29,849
imikino yose yakinnye: 360
ibitego: 17
Imipira yatanze ivamo ibitego: 7
kutinjizwa igitego: 131
Amakarita y’umuhondo: 24
Imituku: 2

Ibikombe 18 yatwaye

4x Champions League
4x FIFA Club World Cup
3x La Liga
3x Supercopa
3x UEFA Super Cup
1x Copa del Rey

Varane yamaze kwrekeza muri United