Umukinnyi Imanishimwe Emmanuel uzwi nka Mangwende afashije APR FC gutwara amanota 3 imbere ya Etincelles FC iyitsinze ibitego 2-0 byose bya Mangwende mu gihe Mukura VS yatsikiriye ku kibuga cyayo I Huye inganya na AS Kigali 0-0.

APR FC yari yitezwe na benshi,yatsinze Etincelles FC ibitego 2-0, ku mukino w’umunsi wa 5 wa shampiyona bituma imara imikino 5 itsinda yikurikiranya, kuri uyu wa Kabiri taliki ya 06 Ugushyingo 2018.

Ibitego byombi bya APR FC byatsinzwe na Imanishimwe Emmanuel Mangwende ku munota wa 28 n’uwa 67 w’umukino,bituma APR FC ikora akandi gahigo ko kumara imikino itanu ya shampiyona 2018/2019 itsinda ibitego 2-0.

APR FC ihise irusha Mukura VS bari bahanganye ku mwanya wa mbere wa shampiyona amanota 2,kuko yo yananiwe gutsindira AS Kigali ya Masudi Djuma kuri stade mpuzamahanga ya Huye,banganya 0-0.

APR FC iyoboye shampiyona n’amanota 15 kuri 15 aho ikurikiwe na Mukura VS igize amanota 13 mu gihe Police na Rayon Sports zitarakina umunsi wa 5 wa shampiyona zinganya amanota 9,zigatandukanwa n’ibitego.

Uko imikino ya shampiyona izakinwa ku munsi w’ejo:

Gicumbi FC vs Amagaju FC (Stade Gicumbi)
Sunrise FC vs SC Kiyovu (Nyagatare grounds)

Ku wa Kane taliki ya 8 Ugushyingo 2018

Espoir FC vs Kirehe FC (Stade Rusizi)
Rayon Sports FC vs Bugesera FC (Stade de Kigali)
AS Muhanga vs Marines FC (Stade Muhanga)
Police FC vs Musanze FC (Stade Mumena)